Ճապոնիայում «Լայոնռոք» թայֆունի հետեւանքով Իվատէ պրեֆեկտուրայում 11 մարդ է զոհվել, երեք մարդ էլ Հոկայդոյում անհետ կորած է համարվում, հայտնում է NHK հեռուստաընկերությունը:
Իվատէ նահանգի Իվաիձումի քաղաքի ծերանոցում ինը մարդ է զոհվել: Ականատեսների խոսքով գետում ջրի մակարդակը կարճ ժամանակում բարձրացել ու վեց մետրի է հասել:
Այդ նույն պրեֆեկտուրայում Կուձի քաղաքում սողանքների պատճառով փլատակների տակ է մնացել մի տարեց կին: Զոհվածներից մեկին էլ ոստիկանությունն է գտել գետի ափին: Հոկայդոյում անհետ կորած է համարվում երեք մարդ:
Օգոստոսի 31-ի առավոտից Ճապոնիայի բանակն էլ է միացել փրկարարական աշխատանքներին: Տների կտուրներին ու ավտոմեքենաների վրա նստած օգնության սպասողներին փրկում են ուղղաթիռներով ու նավակներով:
Օգոստոսի 30-ին «Լայոնռոք» թայֆունը անցել է Ճապոնիայի հյուսիսով ու հյուսիս- արեւելքով իր հետ տանելով հորդառատ անձրեւները ու ուժեղ քամին:
