Էստոնիայի նախագահի ընտրությունները Ընտրողների կոլեգիայում կշարունակվեն սեպտեմբերի 24-ին, որովհետեւ չի հաջողվել խորհրդարանում նախագահ ընտրել, չորեքշաբթի հայտնել է երկրի բարձրագույն օրենսդիր մարմնի մամուլի ծառայությունը, հայտնում է «ՌԻԱ Նովոստին»:
Էստոնիայում անուղղակի ընտրությունների երկմակարդականի համակարգ է գործում. նախ խորհրդարանն է փորձում նախագահ ընտրել, բայց եթե թեկնածուներից ոչ մեկին չի հաջողվում ձայների անհրաժեշտ քանակություն հավաքել, ընտրությունները շարունակվում են Ընտրողների կոլեգիայում, որը ձեւավորվում է խորհրդարանի պատգամավորներից եւ տեղական ինքնակառավարման ներկայացուցիչներից:
«Էստոնիայի սահմանադրության եւ Հանրապետության նախագահի ընտրությունների մասին օրենքի համաձայն, խորհրդարանի խոսնակ Էյկի Նեստորը ընտրողների կոլեգիա է հրավիրել նախագահ ընտրելու համար, այն կգումարվի «Էստոնիա» համերգային դահլիճում` 2016 թվականի սեպտեմբերի 24-ին, ժամը 12:00-ին», — ասված է մամուլի ծառայության հաղորդագրության մեջ:
Քվեարկության երեք փուլերի ընթացքում, որոնք խորհրդարանում ընթացել են երկուշաբթի եւ երեքշաբթի, պատգամավորներին չի հաջողվել Էստոնիայի ղեկավար ընտրել, որովհետեւ ներկայացված թեկնածուներից ոչ մեկը չի հավաքել հաղթանակի համար անհրաժեշտ ձայների քանակը: Խորհրդարանում գաղտնի քվեարկության արդյունքում հաղթելու համար հավակնորդին անհրաժեշտ էր հավաքել պատգամավորների ձայների առնվազն երկու երրորդը, կամ ոչ պակաս, քան 68 ձայն 101-ից:
Քվեարկության երրորդ փուլի ընթացքում Եվրահանձնաժողովի նախկին փոխնախագահ Սիյմ Կալլասը, որին առաջադրել են աջ կոալիցիայի մեջ մտնող Բարեփոխման կուսակցության եւ Սոցիալ-դեմոկրատական կուսակցության խմբակցությունները, 42 ձայն է ստացել, նրա մրցակցուհու` խորհրդարանի պատգամավոր Մայլաս Ռեպսի օգտին, որին առաջադրել էր ընդդիմադիր Ցենտրիստական կուսակցության խմբակցությունը, քվեարկել է 26 պատգամավոր:
Այժմ ընտրությունները կշարունակվեն Ընտրողների Կոլեգիայում, որի մեջ խորհրդարանի 101 պատգամավոր կմտնի եւ տեղական ինքնակառավարման 234 ներկայացուցիչ, ընտրություններն անցկացվում են երկու փուլով: Հաղթանակի համար բավական է, որ թեկնածուն ձայների մեծամասնություն ստանա: Ավտոմատ կերպով թեկնածու են դառնում խորհրդարանում քվեարկության երրորդ փուլի մասնակիցները` Սիյմ Կալլասը եւ Մայլիս Ռեպսը: Բացի այդ, ընտրողների խումբը, որի կազմում առնվազն 21 մարդ պետք է լինի, կարող է իր թեկնածուին առաջադրել: