Իրանը մինչեւ ընթացիկ տարեվերջ կսկսի նավթ արդյունահանել Պարսից ծոցի Հարավային Փարս հանքավայրում: Այս մասին հայտնել է Իրանի նավթի փոխնախարար, Իրանի ազգային նավթային ընկերության ղեկավար Ալի Կարդորը, հավելելով, որ տարեվերջին Իրանը Հարավային Փարս հանքավայրի առաջին հատվածից կսկսի օրական 35 հազար բարել արդյունահանել:
Ինչ վերաբերում է հանքավայրի նավթատար մասի երկրորդ ու մյուս հատվածներին՝ ապա դրանց մշակումը մտադիր են փոխանցել օտարերկրյա ընկերություններին, քանի որ Իրանը այնտեղ նավթարդյունահանում իրականացնելու տեխնոլոգիաներ չունի, նշել է Կարդորը: Նրա խոսքով, այդ հատվածի յուրացման համար միջազգային տենդեր կհայտարարվի նոր կանոններով, որոնք պետք է շուտով հաստատվեն Իրանի խորհրդարանում:
Պարսից ծոցում ՝ Իրանի ու Կատարի միջեւ գտնվող աշխարհի այս խոշորագույն նավթագազային հանքավայրը երկու մասի է բաժանված՝ իրանական ու կատարական: Իրանական մասի պաշարները գնահատվում են 13.8 տրլն խորանարդ մետր գազ ու 27 մլրդ բարել նավթ: Իրանը աստիճանաբար է յուրացնում հանքավայրը ՝ դրա ամբողջ մակերեսը բաժանելով 28 հատվածների:
Իրանի նավթի նախարարության տվյալներով հունիսին Իրանը Հարավային Փարսում օրական 354 խոր մետր գազ էր արդյունահանում, սակայն նավթի արդյունահանումը դեռ չի սկսվել, մինչդեռ Կատարը արդեն անցած դարի վերջից այդ հանքավայրից նավթ է արդյունահանում:
