Հայաստանը կարող է եւ պետք է ջանքեր ներդնի Ռուսաստանի ներմուծման փոխարինման ծրագրին միանալու համար: Այսօր՝ օգոստոսի 31-ին, լրագրողների հետ հանդիպմանն այս մասին հայտարարել է քաղաքագետ, Եվրասիական փորձագիտական ակումբի անդամ Արամ Սաֆարյանը:
Նա հիշեցրել է, որ մայիսի 31-ին Աստանայում տեղի ունեցած Եվրասիական տնտեսական բարձրագույն խորհրդի նիստին Ռուսաստանի նախագահ Վլադիմիր Պուտինը հայտարարել էր, որ միության երկրները տնտեսության առանցքային ճյուղերում պետք է միասնական քաղաքականություն վարեն եւ միանան Ռուսաստանի կողմից իրականացվող ներմուծման փոխարինման ծրագրին: Պուտինը կոչ էր արել մասնակցել տնտեսության ավելի քան 25 ճյուղերի համար սարքավորումների արտադրությանը:
Հայաստանի համար մեծ հետաքրքրություն է ներկայացնում մասնակցությունը բարձրտեխնոլոգիական արտադրությանը, այդ թվում՝ ռազմա-արդյունաբերական համալիրի համար: Հայաստանն այդ ճյուղերը կարող է ստեղծել, իսկ դրանցից շատերը վերականգնել: Դրա համար անհրաժեշտ է գիտա-հետազոտական եւ նախագծային-փորձարարական աշխատանքների գծով կապ հաստատել ԵՏՄ երկրների, մասնավորապես Ռուսաստանի հետ:
«Այդ ամենը թույլ կտա վերականգնել ինժեներական մտքի երբեմնի հզոր դպրոցը եւ արժանավայել զբաղմունքի պայմաններ ստեղծել»,- հայտարարել է Սաֆարյանը: