Լեռնային Ղարաբաղի Հանրապետության անկախությունը ժողովրդի ֆիզիկական գոյության երաշխիքն է: Օգոստոսի 31-ին տեղի ունեցած մամուլի ասուլիսին այս մասին հայտարարել է իշխող Հանրապետական խմբակցության պատգամավոր Շիրակ Թորոսյանը:
Նրա խոսքով՝ Լեռնային Ղարաբաղի անկախությունն ինքնանպատակ անկախություն չէ՝ հանուն անկախության: «Դա ժողովրդին ֆիզիկական բնաջնջումից փրկելու միջոց է: Մենք դրա ականատեսը դարձանք ապրիլյան պատերազմի օրերին, երբ ադրբեջանցի զինծառայողները տարեց մարդկանց սպանեցին՝ նրանց դաժան խոշտանգումների ենթարկելով»,- հիշեցրել է Շիրակ Թորոսյանը՝ հավելելով, որ Լեռնային Ղարաբաղի անկախության մյուս ձեռքբերումն այն է, որ հայության հայրենիքի մի հատվածում ստեղծվել է հայկական երկրորդ պետությունը:
«Երրորդ ձեռքբերումը պետականության կառուցումն է: Ներկայիս սերունդն իր գոյությունը Ադրբեջանի կազմում չի պատկերացնում: Նրանք օժտված են անկախ մտածողությամբ»,- ասել է Շիրակ Թորոսյանը:
Հիշեցնենք, որ սեպտեմբերի 2-ին նշվում է Լեռնային Ղարաբաղի Հանրապետության Անկախության օրը: