Ադրբեջանի լուծարված ԱԱՆ-ի նախկին ղեկավար Էլդար Մահմուդովն իր թիկնապահների թվով հետեւում է թողել ԱՄՆ-ի նախագահի պահակախումբը: Էլդար Մահմուդովի անձնական պահակախումբը կազմված էր ոչ ավել, ոչ պակաս` 40 մարդուց, ինչն աշխարհում իր նմանը չուներ, գրում է Moderator.az-ը:
«Անհրաժեշտ է հաշվի առնել, որ դա ընդամենը Էլդար Մահմուդովի անձնական պահակախումբն է, որը նրան պահպանում էր նախարարություններում եւ պաշտոնական միջոցառումներին: Եվ չնայած այն բանին, որ թիկնապահների թիվը մի քանի անգամ գերազանցում էր անհրաժեշտ թիվը, Մահմուդովը մինչեւ պաշտոնավարության վերջին օրը չէր մտածում դրա կրճատման մասին: Ընդհակառակը, նա ուզում էր ավելի մեծացնել իր թիկնապահների բանակը:
Էլդար Մահմուդովը հպարտանում էր նման մեծ պահակախմբի առկայությամբ, նա համարում էր, որ թիկնապահների նման քանակությունն ընդգծում է իր բացառիկությունը: Կես վաշտ թիկնապահներն ուղերձ են մյուս պաշտոնյաներին սեփական նշանակության եւ անփոխարինելիության մասին», – ասում է պարբերականի իրազեկ աղբյուրը:
Իր անձնական պահակախումբ, ինչպես նաեւ ԱԱՆ-ի այլ կառույցներ Էլդար Մահմուդովը մարդկանց ընդունում էր ոչ թե անվարձահատույց, այլ որոշակի վճարի դիմաց: ԱԱՆ-ի նախկին ղեկավարի անձնական թիկնապահի պաշտոնը 50 հազար մանաթ արժեր: Այսինքն` Էլդար Մահմուդովը իր անձնական պահակախմբի շնորհիվ եւս երկու մլն է վաստակել: Բացի իր անձնական պահակախմբից, իր անհամար օբյեկտների, վիլլաների, ամառանոցների եւ բնակարանների պահպանության համար Էլդար Մահմուդովը հարյուրավոր մարդկանց էր ներգրավել: Կարելի է միայն կռահել, թե դրա շնորհիվ նա որքան է վաստակել, նշում է պարբերականը:
