Պոտսդամում ԵԱՀԿ արտգործնախարարների գալիք ոչ պաշտոնական խորհրդի կարեւոր օրակարգային թեման է լինելու սպառազինությունների նկատմամբ վերահսկողության հարցը: Այս մասին հայտնել է Գերմանիայի ԱԳ նախարար Ֆրանկ Վալտեր Շտայնմայերը: Խորհրդի նիստը ծրագրված է սեպտեմբերի 1-ին, փոխանցում է «ՌԻԱ Նովոստին»:
«Մեր ծրագրի կարեւոր թեման է լինելու սպառազինումների նկատմամբ վերահսկողությունը: Ես կարծում եմ, որ հենց հիմա եկել է ճիշտ ժամանակը ավելի շատ թափանցիկության, ռիսկերի նվազեցման ու վստահության կառուցման համար»- հայտնել է նախարարը:
Ավելի վաղ Շտայնմայերը Frankfurter Allgemeine Zeitung թերթում հրապարակված իր հոդվածում կոչ էր արել Եվրոպայում սպառազինությունների նկատմամբ վերահսկողության մասին նոր համաձայնագիր կնքել, խուսափելու համար Ռուսաստանի ու ՆԱՏՕ-ի միջեւ սպառազինությունների մրցավազքից: Շտայնմայերը նաեւ հայտնել էր, որ Ռուսաստանը արդեն բազմիցս այդ թեմայով քննարկում սկսելու կոչ էր արել: Ավելի ուշ դաշինքի ներկայացուցիչը ՌԻԱ Նովոստիին հայտնել է, որ ՆԱՏՕ-ն ողջունում է ցանկացած ջանքեր, որոնք կհանգեցնեն Եվրոպայում սպառազինությունների նկատմամբ վերահսկողության բարձրացմանը, ու կշարունակի Ռուսաստանի հետ քննարկել թափանցիկության ու ռիսկերի նվազեցման ուղղությամբ քայլերը:
