Մինչեւ 2018 թ. կարելի է ակնկալել Հայաստանի բյուջեի պակասուրդի կրճատում մինչեւ 2.8 տոկոս: Այս մասին լրագրողներին օգոստոսի 31-ին ասել է դոցենտ, Հայաստանի պետական տնտեսագիտական համալսարանի Հայաստանի տնտեսական զարգացման գնահատման ու կանխատեսման հետազոտական խմբի անդամ Աշոտ Թեւիկյանը:
2015-ին պակասուրդը կազմել է բյուջեի 4.8 տոկոսը, իսկ 2016-ին՝ ամենայն հավանականությամբ կկազմի 4.5 տոկոս, ինչը նկատելիորեն բարձր է պլանային ՝3.5 տոկոսի ցուցանիշից:
Այդուհանդերձ, 2018-ին կարելի է ակնկալել կրճատում մինչեւ 2.8 տոկոս՝ ներքին պահանջարկի հաշվին, հավելեց նա:
Ինչ վերաբերում է պետպարտքին, ապա 2016-ի հունիսի վերջի դրությամբ ընդհանուր պետպարտքը կազմել է 5.35 մլրդ դոլար, որոնցից 4.39 մլրդ-ը, կամ 82.1 տոկոսը արտաքին պարտքն է, իսկ մնացածը ՝ ներքին:
Միջազգային կազմակերպությունների գնահատականով, Հայաստանի ընդհանուր պարտքը 2016-ի վերջին կաճի մինչեւ ՀՆԱ 52.4 տոկոս մինչդեռ 2015-ի վերջին 48.7 տոկոս էր: Պարտային ծանրաբեռնվածության աճը չի ազդել երկրի տնտեսության վրա, քանի որ պարտքերը հիմնականում երկարաժամկետ են վերցված, ցածր տոկոսադրույքներով: