Գիտնականները լրջորեն անհանգստացած են երեւան եկող կլիմայական միտումներով, որոնց համաձայն՝ 2015-ի հոկտեմբերից ի վեր ամեն ամիս ջերմաստիճանային ռեկորդներ են սահմանվում:
2016-ի հուլիսը օդերեւութաբանական դիտարկումների պատմության ընթացքում ամենաշոգ ամիսն է եղել. ի դեպ, օդերեւութաբանական դիտարկումները կատարվում են 1880 թվականից: Եթե միտումները պահպանվեն, եւ Երկիր մոլորակն այսուհետեւ եւս շարունակի այդքան սրընթաց տաքանալ, ապա մարդկությանն ահավոր վտանգ է սպառնում: Այս մասին գրում է Planet Today-ը՝ վկայակոչելով The Guardian-ը:
Վերջին 10 տարիների ընթացքում Երկրագնդի ջերմաստիճանն սկսել է անհավանական տեմպերով աճել, որոնք գերազանցում են գոյություն ունեցող բոլոր կանխատեսումները: Եթե հետագայում եւս այսպես շարունակվի, ապա 21-րդ դարավերջին արդեն Երկրագնդի տաքացումը կընթանա 20 անգամ ավելի ինտենսիվ, քան այժմ: Չնայած սա եւս բավական լավատեսական կանխատեսում է, իրականում շատ ավելի վատ կլինի, ասել են ԱՄՆ Աերոտիեզերական ազգային գործակալության ներկայացուցիչները:
Ջերմաստիճանի բարձրացումը պայմանավորված է գլոբալ տաքացմամբ, որը մարդկության հիմնական սպառնալիքներից մեկն է, ասում են գիտնականները՝ մարդկանց կոչ անելով հենց հիմա զբաղվել այդ խնդրով, այլապես վաղն այլեւս ուշ կլինի:
