Google-ը մտադիր է Սան Ֆրանցիսկոյի փողոցներում ավտոմեքենայի համատեղ օգտագործման Waze ծրագիր թողարկել: Դա տեղի կունենա աշնանը: Հեռանկարում նոր ծառայությունը կդառնա Uber-ի մրցակիցը, որի գործընկերը մինչ օրս Google-ն է: Այս մասին գրում է «Կոմերսանտ»-ը:
The Wall Street Journal-ը, վկայակոչելով սեփական աղբյուրները, հայտնել է, որ Google-ը ծրագրում է արդեն աշնանը Waze հավելվածը թողարկել Սան Ֆրանցիսկոյի փողոցներում համատեղ ավտոուղեւորությունների համար. դա մինչ օրս հասանելի էր միայն ընկերության աշխատակիցներին:
Waze ծառայությունը թույլ կտա հավելվածի օգտատիրոջն անհրաժեշտ ուղղությամբ ընթացող վարորդների գտնել: Ինքը վարորդը բենզինի ծախսի մի մասի համար վճարող ուղեկիցների հաշվին կկարողանա զգալիորեն կրճատել մեքենայի շահագործման սեփական ծախսերը: Alphabet-ը մտադիր է համատեղ ուղեւորության սակագներն այնքան ցածր սահմանել, որպեսզի չեզոքացնի այլ վարորդների, հատկապես տաքսիստների՝ այս հավելվածով գումար վաստակելու ցանկությունը:
Պիլոտային ծրագրի փուլում ուղեւորության սակագինը կկազմի մոտ 1 կմ-ը 0,34 դոլար, ինչն անհամեմատ էժան է՝ Uber-ի կամ Lyft-ի սակագների համեմատությամբ: Ըստ որում՝ մինչ օրս Google-ն այդ գումարից տոկոսներ չի ստացել: Ինչ վերաբերում է պոտենցիալ հաճախորդներին, ապա այն առայժմ կսահմանափակվի այն ֆիրմաների 25 հազար աշխատակիցներով, որոնց հետ Google-ը համաձայնության է եկել: Դրանց թվում են Wal-Mart-ը եւ Adobe-ը:
