Acer ընկերությունը ներկայացրել է Predator 21 X խաղային նոթբուք, որը 21-դյույմանոց կոր էկրան ունի: Այս մասին գրում է Newsru-ն:
CNet-ի փոխանցմամբ՝ Acer Predator 21 X-ը աշխարհում առաջին նոթբուքն է, որը կոր էկրան ունի՝ 2560*1080 պիքսել խտությամբ: Սարքը հագեցած է երկու GeForce GTX 1080 տեսաքարտերով, սնուցման երկու բլոկներով, հինգ հովացուցիչով եւ ջերմային 8 խողովակներով: Նոթբուքն աշխատում է Intel Core պրոցեսորի 7-րդ սերնդի հիմքի վրա, որի օպերատիվ հիշողության ծավալը կարող է հասնել 64 Գբ-ի, SSD կրիչների համար սլոթների թիվը 5 է:
Նոթբուքի մյուս առանձնահատկությունը լիարժեք մեխանիկական ստեղնաշարն է՝ յուրաքանչյուր ստեղնի լուսավորմամբ: Acer Predator 21 X-ն ունի 4 բարձրախոսներ:
Հաշվի առնելով նոթբուքի չափերը եւ պարունակությունը՝ այն ամենեւին շարժական չես համարի: Acer Predator 21 X-ը 8 կգ է կշռում, ինքնավար աշխատանքի մոտավոր ժամկետը հայտնի չէ, սակայն կարելի է ենթադրել, որ այդ ցուցանիշը բավական համեստ է:
