Երեւանի Ավան համայնքի Չարենց թաղամասի թիվ 9 շենքի բնակչի սպանության մեջ կասկածվող տղամարդը հայտնաբերվել եւ կալանավորվել է: Այս մասին NEWS.am-ը տեղեկանում է ոստիկանության կայքէջից:
Օգոստոսի 23-ին երեկոյան Չարենց թաղամասի թիվ 9 շենքի վերելակում հայտնաբերվել էր նույն շենքի բնակիչ 40-ամյա Ալեքսանդր Բերգելյովի դին: Զննությամբ դիակի վրա հայտնաբերվել էին կտրող ծակող հետքեր, որոնց հետեւանքով էլ մահացել էր:
Նախնական տվյալներով՝ սպանվածը վիրավոր վիճակում մտել է վերելակ, որտեղ էլ մահացել է: Այդ նույն օրը հարեւանների ահազանգով դեպքի վայր ժամանած ոստիկանները տեսել են, որ բակում ավտոտնակ է այրվում եւ տվյալ վայրում մի տղամարդ է կանգնած դանակը ձեռքին: Տղամարդը 73-ամյա Էդմոն Սիմոնյանն է եղել: Ավելի ուշ պարզվել է, որ սպանվածն ու Էդմոն Սիմոնյանը ավտոտնակը հրդեհելու շուրջ վիճել են: Էդմոն Սիմոնյանը պատմել է, որ ինքը կասկածել է՝ ավտոտնակը հրկիզել է Ալեքսանդրը, որի հետ վիճել է, ապա դանակով հարվածներ հասցրել: էդմոն Սիմոնյանը կալանավորվել է: