Գերմանիայի կանցլեր Անգելա Մերկելն Իտալիային օգնություն է խոստացել երկրաշարժից տուժած շրջանների վերականգնման համար: Այս մասին հաղորդում է DW-ն:
«Մենք մտադիր ենք ֆինանսավորել դպրոցներից մեկի վերականգնումը»,-Մարանելլո քաղաքում Իտալիայի վարչապետ Մատեո Ռենցիի հետ հանդիպումից հետո ասել է Մերկելը:
Նա ընդգծել է, որ օգնություն կցուցաբերի ոչ միայն Գերմանիայի կառավարությունը: Իրենց լուման կներդնեն նաեւ գերմանական տնտեսությունն ու Գերմանիայի ֆուտբոլի ֆեդերացիան:
Ռենցին իր հերթին շնորհակալություն է հայտնել Անգելա Մերկելին եւ Գերմանիային՝ շուրջ 300 մարդու կյանք խլած ավերիչ երկրաշարժի հետ կապված համերաշխության համար:
Մատեո Ռենցին նաեւ մեկնաբանել է Եվրոպայում ապօրինի միգրացիայի հետ կապված իրադրությունը: Նրա խոսքով՝ Գերմանիան եւ Իտալիան պետք է շարունակեն համագործակցել՝ Եվրոպայում փախստականներին հավասարաչափ եւ արդարացի տեղաբաշխելու համար: Միաժամանակ, Ռենցին անմիտ է անվանել պատկերացումները, որ Եվրոպան պետք է ընդունի բոլոր փախստականներին: