«Հայկական ժամանակ» թերթը գրում է. «ՀՀ-ից Ռուսաստան արտահանման ծավալների կտրուկ աճը այս տարվա առաջին կիսամյակում արդարացված կասկածներ է առաջացնում պաշտոնական վիճակագրության հավաստիության նկատմամբ: Որոշ ապրանքների արտահանումը աճել է հազարավոր անգամներով:

Մասնավորապես, ՀՀ մաքսային ծառայության հրապարակած պաշտոնական տեղեկանքի համաձայն այս տարվա առաջին կիսամյակում Ռուսաստան է արտահանվել «Ուղեպայուսակ, ճամպրուկ, դրամապանակ, ակնոցի, հեռադիտակի եւ այլ պայուսակներ, տուփեր» ապրանքախմբում ներառված 30 հազար 704 հատ ապրանք 1,2 մլն դոլար ընդհանուր արժեքով:

Անցած տարվա նույն ժամանակահատվածում այդ նույն ապրանքախմբի ապրանքներից ՌԴ էր արտահանվել ընդամենը 14 հատ: Աճը կազմում է 2 հազար 193 անգամ:

Թե ինչպես է ստացվել նմանատիպ ապրանքների արտահանման ավելի քան 2 հազար անգամյա աճ, առանձին ուսումնասիրության առարկա է: Սակայն հիմնավոր կասկածներ կան, որ դրանք իրականում թուրքական ապրանքներ են: Քանի որ այս տարվա սկզբից ՌԴ-ն պատժամիջոցներ էր մտցրել թուրքական որոշ ապրանքների վրա, ապա այդ ապրանքների մի մասը մուտք էին գործում այլ երկրներ, ձեւակերպվում որպես տվյալ երկրի արտադրանք ու վերաարտահանվում ՌԴ:

Հայաստանը, թերեւս, անմասն չի մնացել այդ սխեմաներից: Պետք է սպասել, որ ռուս-թուրքական հարաբերությունների կարգավորման հետեւանքով ՀՀ-ից ՌԴ ապրանքների արտահանման ծավալները կարող են զգալիորեն նվազել»:

Առավել մանրամասն՝ թերթի այսօրվա համարում