ԼՂՀ Պաշտպանության բանակի հյուսիս-արեւելյան դիրքերից մեկում սեպտեմբերի 7-ին 19-ամյա Արման Ղանդիլյանը, հարազատների տեղեկություններով, մահացել է թյուրիմացության հետեւանքով:
«Նոր է տեղափոխված եղել էդ դիրքեր, զուգարան գնալուց ճանապարհը խառնել է: Հակառակ կողմից է գնացել, գաղտնաբառ են հարցրել, չի պատասխանել, հետո մինչեւ ասել է՝ Արմանն եմ, խփել են»,- NEWS.am-ին պատմեց զինծառայողի բարեկամներից մեկը:
1997թ. ծնված Արման Ղանդիլյանը ձախ այտի շրջանում հրազենային վիրավորում էր ստացել սեպտեմբերի 7-ին՝ ժամը 01:30-ի սահմանում: ԼՂՀ նախագահ Բակո Սահակյանի հրամանագրով Լեռնային Ղարաբաղի Հանրապետության պետական սահմանը պաշտպանելիս ցուցաբերած արիության համար Արման Ղանդիլյանը հետմահու պարգեւատրվել է «Մարտական ծառայություն» մեդալով:
Արմեն Ղանդիլյանը Գավառ քաղաքի բնակիչ էր, ընտանիքի միակ զավակը: Նա մեկ տարի առաջ էր զորակոչվել բանակ:
