2010թ. հոկտեմբերի 14-ը պատմական դարձավ ռուսական ավտոսպորտի համար: Ֆորմուլա-1-ի գլխավոր պրոմոուտեր Բերնի Էքլսթոունը եւ Կրասնոդարի երկրամասի նահանգապետ Ալեքսանդր Տկաչեւը ստորագրեցին Սոչիում Ռուսաստանի Մեծ մրցանակի խաղարկություն անցկացնելու մասին պայմանագիր: Ֆորմուլա-1-ի աշխարհի առաջնության փուլերից մեկը Ռուսաստանը կընդունի 2014-ին, հաղորդում է f1news.ru-ն:

Արարողությանը ներկա են եղել Ռուսաստանի վարչապետ Վլադիմիր Պուտինը եւ բիզնեսի ներկայացուցիչներ: Ռուսաստանի կառավարությունը հանդես է եկել նախագծի երաշխավորի դերում: Ավտոարշավարանը կկառուցվի Սոչիի մերձակայքում գտնվող Օլիմպիական ավանում: Գերման Տիլկեի նախագծած ավտոարշավարանը կընդգրկի նաեւ հասարակական ճանապարհների հատվածներ: Ընդհանուր երկարարությունը կլինի մոտ 5,5 կմ: