Ամպագոռգոռ չեն հնչի այն բառերը, թե երբեւէ որեւէ ազգային առաջնություն այսպիսի ուժեղ ու ինտրիգային չի եղել, որքան այս տարվա անգլիական Պրեմիեր լիգան: Այնպես ստացվեց, որ հենց 2016-17 մրցաշրջանը հավաքեց ամենաաստղային մարզիչներին ու ֆուտբոլիստներին մեկ առաջնությունում: Մեկ մրցաշրջան մենք կհետեւենք, թե ինչպես են միանգամից մի քանի ուժեղ թիմեր, աշխարհի լավագույն մարզիչները իրար հետ մրցելու ամեն միավորի համար: Բայց, իհարկե, Անգլիայի առաջնության ամենաուժեղ դիմակայությունը մեզ նվիրում է Մանչեսթեր քաղաքը: Ինչպես ասում են բախտի բերմամբ, թե պատահմամբ աշխարհի ուժեղագույն մարզիչներից երկուսը՝ հավերժ մրցակիցներ Ժոզե Մոուրինյոն ու Խոսեպ Գվարդիոլան ղեկավարեցին Մանչեսթերի ակումբները: Սկանդալիստ Մոուրինյոն փոխարինեց երկու մրցաշրջան ձախողած Լուի Վան Գալին «Յունայթեդում», «ինտելիգենտ» Գվարդիոլան՝ Մանուել Պելեգրինիին «Սիթիում»:

Մուրիյոն ու Գվարդիոլան հասել են հաջողությունների թե Չեմպիոնների լիգայում, թե ազգային առաջնություններում: Նրանց դիմակայությունը սրվեց, երբ երկուսը գլխավորեցին Իսպանիայի ուժեղագույն թիմերը՝ «Ռեալն» ու «Բարսելոնան»: Վերջին անգամ նրանք հանդիպեցին Եվրոպայի Սուպերգավաթի եզրափակչին, որտեղ «Չելսի» վերադարձած Ժոզեն պարտվեց Գվարդիոլայի «Բավարիային»: 

Պրեմիեր լիգայի չորրորդ տուրից առաջ «Յունայթեդն» ու «Սիթին» ունեն հավասար 9 միավոր: Գոլորի տարբերությամբ Գվարդիոլայի թիմը այս պահին առաջատարն է:

Թիմերը հանդիպել են ընդհանուր առմամբ 172 անգամ, որից «Յունայթեդը» հաղթանակ է տարել 71, անգամ, պարտվել 49 անգամ եւ 51 խաղ ավարտել ոչ-ոքի: Խփված եւ բաց թողած գոլերի տարբերությունը՝ 250-234 է: «Սիթին» ամառային տրանսֆերների վրա ծախսել է 176 միլիոն եվրո, սակայն այս տարվա տրանսֆերային բումը պատկանում է «Յունայթեդին»՝ Իբրահիմովիչ, Պոգբա, Մխիթարյան: «Յունայթեդի» նորեկները արդեն լիովին հարմարվել են թիմին: Իբրահիմովիչի արդյունավետությունը միջինում մեկ խաղում մեկ գոլ է: Մոուրինյոյի խոսքերով Հայաստանի ազգային հավաքականի ավագ Հենրիխ Մխիթարյանը պատրաստ է խաղին: Հնարավոր է՝ հայ ֆուտբոլիստը նույնպես մասնակցի այս կարեւորագույն դերբիին:

Ամենայն հավանականությամբ, Մոուրինյոյի թիմը խաղադաշտ դուրս կգա մշտական կազմով՝ առջեւի գծում Իբրահիմովիչ, հետեւից՝ Ռունին: Կիսապաշտպանության գիծը կլրացնեն Մարսյալն ու Մատան եզրից, կենտրոնում Պոգբան ու Հերրերան: «Յունայթեդի» պաշտպանությունը այս պահին համարվում է Եվրոպայի լավագույներից մեկը: Պրեմյեր լիգայում բաց են թողել միայն 1 գնդակ: «Սիթին» իր հերթին բաց է թողել 3, բայց նաեւ խփել է ավելի շատ՝ 9: Մեծ կորուստ է «Սիթիի» համար Սերխիո Ագուերոյի բացակայությունը: Նա որակազրկված է:Ագուերոյի բացակայությունը կփորձեն լրացնել Իխեանաչոն, Ստերլինգը, Սիլվան, Դե Բրյոինեն ու Նոլիտոն:

Այստեղ էլ վիճակագրությունը Գվարդիոլայի օգտին է: Նա 7 անգամ հաղթել է Մոուրինյոյին, 6 ոչ-ոքի խաղացել եւ 3 անգամ պարտվել՝ «Բարսելոնա» – «Ինտեր», «Բարսելոնա» – «Ռեալ» եւ «Բավարիա» – «Չելսի» խաղերում:

Ֆուտբոլասերները սպասում են գոլառատ խաղ: Սա դերբի է, խաղում են սկզբունքային մրցակիցներ: Մասնագետները չեն շտապում այս խաղին տալ «տոտալ շատ» գործակիցը: «Յունայթեդը» գոլեր բաց չի թողնում, «Սիթին» էլ չի ցանկանա սխալվել: Անկախ ամեն ինչից այս խաղը արժի դիտել միայն այն բանի համար, որ այն հաստատ լինելու է աշնան կարեւորագույն հանդիպումը: Անհնար է, որ Special one-ը եւ ինչպես ասում են ժամանակի «հանճարեղ մարզիչ» Գվարդիոլան մեզ նվեր չմատուցեն:

Իսկ ես ինձ թույլ տամ եւ կատարեմ համեստ կանխատեսում: «Օլդ Տրաֆորդում» «Յունայթեդը» չի պարտվի «Սիթիին»: Մեծ է հավանականությունը, որ Իբրահիմովիչը կդառնա գոլի հեղինակ:

Հիշեցնենք, որ «Մանչեսթեր Յունայթեդ» – «Մանչեսթեր Սիթի» խաղը սկսկվի ժամը 15։30-ին: Խաղը կսպասարկի Մարկ Կլատենբուրգը:

Վերա Մարտիրոսյան