Սիրիայի բանակի եւ Զինված ուժերի գլխավոր հրամանատարությունը հայտարարել է, որ սեպտեմբերի 12-ին հայտարարված՝ ռուս-ամերիկյան համաձայնությունների հիման վրա ռազմական գործողությունների դադարեցման ռեժիմն ավարտված է, հայտնել է SANA պետական լրատվական գործակալությունը:
«Ենթադրվում էր, որ ռազմական գործողությունների դադարեցման ռեժիմը արյունահեղությանը կասեցնելու իրական հնարավորություն կտա, սակայն ահաբեկչական խմբավորումները անտեսել են համաձայնագիրը՝ դրա եւ ոչ մի կետը չկատարելով, եւ «լռության ռեժիմը» խախտել են ավելի քան 300 անգամ»,- նշված է հայտարարության մեջ:
«Ահաբեկչական կազմավորումները ռազմական գործողությունների դադարեցման ռեժիմն օգտագործել են վերախմբավորվելու եւ վերազինվելու, խաղաղ բնակավայրերի եւ բանակի դիրքերի վրա հարձակվելու, մասշտաբային ահաբեկչական հարձակումներ նախապատրաստելու համար, հիմնականում՝ Հալեպի, Համայի եւ Կունեյտրայի նահանգներում:
Գերագույն հրամանատարությունը շեշտել է, որ Սիրիայի Զինված ուժերը առավելագույն ջանքեր է գործադրել ռազմական գործողությունների դադարեցման ռեժիմը կատարելու համար՝ չհակադարձելով ահաբեկիչների բազմաթիվ սադրանքներին եւ միայն բացառիկ դեպքերում պատասխան կրակ բացելով;
Սիրիայի բանակը վճռական է տրամադրված ահաբեկիչների դեմ պայքարում իր ազգային պարտքը կատարելու հարցում՝ մինչեւ Սիրիայի ամբողջ տարածքում անվտանգության եւ կայունության վերականգնումը»,- նշված է հայտարարության մեջ:
