«Սասնա ծռեր» խմբի անդամ Աշոտ Պետրոսյանը եւս երկու ամիս կմնա անազատության մեջ: Այսօր՝ սեպտեմբերի 20-ին, Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանը բավարարեց նախաքննական մարմնի միջնորդությունը՝ Աշոտ Պետրոսյանի կալանքը երկու ամիս երկարացնելու վերաբերյալ:
«Նախաքննական մարմնի հիմնավորումը նույնն էր` մնալով ազատության մեջ կթաքնվի, կխոչընդոտի եւ ապօրինի ճնշումներ կգործադրի նախաքննական մարմնի վրա: Երբ անձի նկատմամաբ կալանավորման ժամկետը երկարացնելու մասին է խոսքը գնում, կալանավորումը հիմնավորող փաստեր են պետք, որոնք այս դեպքում չկային: Ես դատարանում էլ ասացի, որ մենք ավելի շատ գործ ունենք ոչ թե իրավաբանության հետ, այլ՝ քաղաքական հարցի լուծման»,-NEWS.am-ի հետ զրույցում ասաց Աշոտ Պետրոսյանի պաշտպան Արայիկ Պապիկյանը:
Նա նշեց, որ այսօր միջնորդել է նաեւ իր պաշտպանյալին գրավի դիմաց ազատ արձակել. «Միջնորդեցի գրավի դիմաց ազատ արձակցել, ասացի, որ գումարի չափ չենք մատնանշում եւ պատրաստ ենք դատարանի որոշած գումարի չափը որպես գրավ վճարել: Աշոտ Պետրոսյանը դատարանի դահլիճում անգամ ամփոփոիչ խոսք չցանակցավ ասել, միայն ասաց, որ ամբողջությամբ միանում է իմ կողմից ներկայացվածին եւ միջնորդությանը»:
Փաստաբանը նշեց, որ Աշոտ Պետրոսյանի առողջական վիճակը լավ է, նա կարողանում է հենակների օգնությամբ քայլել.« Բավականին լավ է, հատկապես վիրահատությունից հետո: Որքան ես եմ հասկանում պատշաճ բուժօգնություն է ստացել: Ճիշտ է «Դատապարտյալների հիվանդանոց» ՔԿՀ-ի պայմանները բավարար չեն, բայց վերաբերմունքի առումով որեւէ խնդիր չկա: Սակայն, ՔԿՀ-ն բավարար պայմաններ չունի այդպիսի հիվանդին համապատասխան պայմաններով ապահովելու համար: Նա հենակների օգնությամբ քայլում է, կարողանում է շարժել նաեւ վիրահատված ոտքը»:
