Ոստիկանությունը հայտնաբերել է սեպտեմբերի 18-ին տեղի ունեցած Կոնդեցի Հարութի սպանության մեջ կասկածվողին:
Այս առնչությամբ, ոստիկանության մամուլի ծառայության տարածած հաղորդագրության մեջ ասվում է.
«Սեպտեմբերի 18-ին, ժամը 23.30-ին, հիվանդանոցից ոստիկանության Կենտրոնականի բաժնում հաղորդում էր ստացվել, որ «կրծքավանդակի ծակած վերք» ախտորոշմամբ բուժօգնության է դիմել 42-ամյա Հարություն Գալստյանը, որը գիտակցության չգալով մահացել էր:
Ոստիկանության Երեւան քաղաքի վարչության եւ Կենտրոնականի բաժնի ծառայողների ձեռնարկած օպերատիվ-հետախուզական միջոցառումների շնորհիվ պարզվել էր, որ հանցագործությունը կատարել է 34-ամյա Արտակ Հ.-ն:
Սեպտեմբերի 20-ին Արտակ Հ.-ի նկատմամբ հայտարարվել էր հետախուզում ՀՀ քրեական օրենսգրքի 104 հոդվածի /սպանություն/ 1-ին մասի մեղադրանքով:
Ոստիկանության ծառայողների բացատրական աշխատանքների շնորհիվ՝ Արտակ Հ.-ն ինքնակամ ներկայացել է ոստիկանության քրեական հետախուզության գլխավոր վարչություն»:
Նշենք, որ Հարություն Գալստյանը առավել հայտնի է «Կոնդեցի Հարութ» մականունով:
Ավելի վաղ NEWS.am-ը հայտնել էր, որ Հարություն Գալստյանի սպանության մեջ կասկածվողը նրա հարեւանն է, որը միեւնույն ժամանակ աշխատում է սպանվածի տաքսի ծառայության ընկերությունում:
Կասկածյալը, որը նախկինում դատապարտված է եղել, ըստ նախնական տվյալների` դեպքի ժամանակ հարբած է եղել: