Տրանսպորտի, կապի եւ տեխնոլոգիաների նորանշանակ նախարար Վահան Մարտիրոսյանը չի բացառում, որ կադրային փոփոխություններ է իրականացնելու նախարարությունում։
«Եթե մարդիկ մեր պահանջներին բավարարում են, չի լինի, եթե ոչ՝ կլինի»,- այսօր՝ սեպտեմբերի` 22-ին, կառավարության նիստից հետո լրագրողների հետ զրույցում նշել է նա:
Հյուսիս-Հարավ մայրուղու, Իրան-Հայաստան երկաթգծի կառուցման վերաբերյալ հարցերին նորանշանակ նախարարը չի պատասխանել, հայտարարելով, որ կուսումնասիրի այդ ուղղությամբ կատարված աշխատանքները՝ նոր կխոսի։
Տաքսու վարորդների պահանջների վերաբերյալ եւս խոստացել է ուսումնասիրելուց հետո քննարկում կազմակերպել. «Ես առաջին օրն եմ եկել, այսօր է ինձ ներկայացրել վարչապետը, փորձեմ ամեն ինչ ճշտել, պարզել մաքսիմալ․․․ ձեր օգնության կարիքն էլ կունենամ, որ միասին աշխատենք։ Տաքսիսիտների խնդիրը մոտավորապես պատկերացնում եմ, բայց ուսումանսիրելուց հետո կհրավիրեմ քննարկելու»։ Նախարարն ասել է, որ ոլորտում փոփոխությունների իր ծրագիրն ունի. «Փոփոխությունների ծրագիր ունեմ կներկայացնեմ»։
Վահան Մարտիրոսյանը նշել է, որ Կարեն Կարապետյանի հետ նորմալ հարաբերություններ ունի, ոչ թե մտերիմ. «Մտերիմ հարաբերությոնների հետ շատերի հետ կա, դա չի նշանակում․․․ մենք նորմալ հարաբերություններ ունենք»: