ԱՄՆ-ի փոխնախագահ Ջո Բայդենն ընդունել է Ռուսաստանի դեմ պատժամիջոցների հարցում ԵՄ-ի հետ լուրջ տարաձայնությունների առկայությունը: Նրա խոսքով, եվրոպական առնվազն հինգ երկիր ցանկանում է դուրս գալ պատժամիջոցների ռեժիմից, հայտնում է «Ամերիկայի ձայնը»:
«Մենք գիտենք, որ եթե ուկրաինացիները ԵՄ-ին առիթ տան, կա առնվազն հինգ երկիր, որոնք ցանկանում են ասել, որ իրենք ուզում են դուրս գալ Մոսկվայի դեմ պատժամիջոցների ռեժիմից», – հայտնել է Բայդենը` ելույթ ունենալով Նյու Յորքում Միջազգային հարաբերությունների խորհրդում:
Բայդենն ասել է, որ Ուկրաինայում ճգնաժամի սկզբից ի վեր ինքը շաբաթը երկու-երեք ժամ է ծախսում ուկրաինացի առաջնորդների հետ հեռախոսազրույցների վրա` նրանց կոչ անելով շարունակել բարեփոխումները եւ միաժամանակ ճնշում է գործադրում Գերմանիայի, Ֆրանսիայի եւ Իտալիայի վրա, որպեսզի նրանք պահպանեն պատժամիջոցների ռեժիմը: «Եվրոպայում շատերը բնազդաբար մտածում են. «Լսեք… սա առանց այն էլ Ռուսաստանին էր պատկանում: Նրանք այնտեղ իրենց խամաճիկն ունեին: Ուրեմն ո՞րն է տարբերությունը: Գրողը տանի, ո՞րն է տարբերությունը: Ինչո՞ւ եք մեզ ներքաշում այս պատժամիջոցների մեջ»», – ասել է Բայդենը:
ԱՄՆ-ի փոխնախագահը հայտնել է, որ ինքը Պորոշենկոյին կոչ է արել ամեն հնարավորն անել, որպեսզի Մինսկյան համաձայնագրերի համար մեղքը չբարդեն Ուկրաինայի վրա: