«Զինված խմբի» գործով մեղադրյալ Գառնիկ Մարգարյանի պաշտպան Հովիկ Արսենյանի համար անհասկանալի է՝ ինչու են իր պաշտպանյալին ու նույն գործով մյուս երկու տասնակ մեղադրյալներին առաջադրել նոր՝ իշխանությունը յուրացնելուն նախապատրաստվելու մեղադրանք:
«Գառնիկ Մարգարյանի եւ Արթուր Վարդանյանի միջեւ հանցավոր համաձայնություն տեղի չի ունեցել իշխանությունը յուրացնելու: Նման թեմա բացվել է նոյեմբերի 17-ին, Գառնիկ Մարգարյանը նրան դուրս է հանել, նունը պնդել է եւ առերեսման ժամանակ, Արթուր Վարդանյանն էլ ասեց, որ համաձայնություն տեղի չի ունեցել»,- ասաց փաստաբանը՝ նշելով, որ մեղադրանքի ծանրանալուց հետո Գառնիկ Մարգարյանը համոզվել է, որ իր նկատմամբ քաղաքական հետապնդում է իրականացվում:
Հովիկ Արսենյանը նշեց, որ Գառնիկ Մարգարյանը ցուցմունք չի տվել՝ պնդելով իր նախկին ցուցմունքները:
Վլադիմիր Առաքելյանի պաշտպան Արայիկ Ալվանդյանը NEWS.am-ի հետ զրույցում ասաց, որ ինքը նույնպես շինծու ինչ-որ բան է տեսնում մեղադրանքի մեջ: Նա նշեց, որ իր պաշտպանյալը նույնպես չի ընդունում մեղադրանքը:
Նոր՝ խստացվախծ մեղադրանքով մեղադրյալներին սպառնում է առավելագույնը 7.5 տարով ավելի խիստ պատիժ:
Նշենք, որ նախկին՝ հանցավոր համագործակցություն ստեղծելու կամ մասնակցելու եւ ապօրինի զենք, զինամթերք ձեռք բերելու, իրացնելու, (223-րդ հոդվածի 1-ին մաս, 235-րդ հոդվածի 2-րդ մաս) մեղադրանքներին ավելացվել է իշխանությունը յուրացնելուն նախապատրաստվելու մեղադրանքը (35-300-րդ հոդված):
