Ռուսական X5 առեւտրի ցանցը հայ մատակարարների հետ բանակցությունները շարունակում է: Այս մասին NEWS.am-ի թղթակցին ասել է ռուսական X5 Retail Group ռիթեյլ-կոնցեռնի պետական կառույցների հետ փոխգործակցության բաժնի ղեկավար Մանուչար Քութատելաձեն:
Նա նշել է, որ փոխըմբռնման բարելավմանը շատ է օգնել ռուսաստանցի ռիթեյլերների եւ հայ արտադրողների հանդիպումը, որը Հայաստանի Տնտեսական մրցակցության պաշտպանության պետական հանձնաժողովի նախաձեռնությամբ հունիսի վերջին տեղի է ունեցել Երեւանում: Ռուսաստանցի ռիթեյլերներին հրավիրել էին պարզաբանելու այն պայմանները, որոնց դեպքում հայկական բիզնեսը կկարողանա նրանց հետ աշխատել:
«Նրանք շփվում են մեր բարձրակարգ մենեջերների հետ, որոնք անմիջականորեն գնահատում են արտադրանքը եւ նշում, թե ինչն է պետք ուղղել, որպեսզի համապատասխանեն մեր ստանդարտներին»,- պարզաբանել է Քութատելաձեն:
Հիմա կողմերը սկսել են հասկանալ, թե X5 խմբի սուպերմարկետներում ինչ նիշ կարող է զբաղեցնել հայկական արտադրանքը՝ որպես զուտ հայկական, հստակ հաստատված նույնականությամբ:
«Ներկայում Եվրասիական տնտեսական հանձնաժողովի նախարարները խոսում են շուկայի թվայնացված վերափոխման մասին: Դրա բաղկացուցիչներից մեկը այն համակարգն է, որի դեպքում հետեւում են ապրանքների եւ ծառայությունների ծագմանը»,- ընդգծել է Քութատելաձեն:
Ռուսական X5 Retail group կոնցեռնը միավորում է «Պյատյորոչկա», «Պերեկրյոստոկ» եւ «Կարուսել» սուպերմարկետները: Հոլդինգը մոտ 147,5 հազար աշխատակից ունի, 2015-ին եկամուտը կազմել է շուրջ 233 մլն դոլար:
