ՌԴ նախագահ Վլադիմիր Պուտինը հայտնել է, որ աջակցում է նոր գումարման Պետդումայի նախագահի պաշտոնի համար Վյաչեսլավ Վոլոդինի թեկնածությանը` հավելելով, որ նրա նշանակումը պատգամավորների առանձնաշնորհն է, հայտնում է Ինտերֆաքսը:
«Ես եւ Դմիտրի Անատոլեւիչն ամեն դեպքում կխնդրենք, որ «Եդինայա Ռոսիյան» աջակցի Վյաչեսլավ Վիկտորովիչ Վոլոդինի թեկնածությանը», - հայտնել է Պուտինը: Նա հույս է հայտնել, որ Վոլոդինի փորձը նրան թույլ կտա ապահովել Դումայի նորմալ աշխատանքը, եթե պատգամավորները հավանություն տան խորհրդարանի ստորին պալատի նախագահի պաշտոնում նրա թեկնածությանը:
Պուտինը հանդիպմանը ներկա անձանց դիմել է` խնդրելով համերաշխորեն արձագանքել Վոլոդինի թեկնածության առաջարկին, որը ներկայումս ՌԴ նախագահի աշխատակազմի պետի առաջին տեղակալն է:
«Եդինայա Ռոսիյայի» Գերագույն Խորհրդի անդամ Վլադիմիր Վասիլեւն աջակցել է ՌԴ նախագահի առաջարկին: