Էջմիածնում ընտրությունների հետաձգման համար իրավական հիմքեր չեն եղել։ Այս մասին սեպտեմբերի 23-ին՝ մամուլի ասուլիսի ժամանակ, ասել է Հայաստանի ԿԸՀ նախագահ Տիգրան Մուկուչյանը։
Անդրադառնալով քաղաքապետի ընտրության նախօրեին Էջմիածնում գրանցված միջադեպին՝ Մուկուչյանը նշեց, որ ընտրական հանձնաժողովները, ինչպես կենտրոնական, այնպես էլ տարածքային, կարող են իրականացնել բացառապես այնպիսի գործողություններ, որոնք նախատեսվում են Ընտրական օրենսգրքով։ «Ընտրական օրենսգրքում ՏԻՄ ընտրությունների կապակցությամբ չկա ոչ մի իրավական դրույթ, որը ընտրական հանձնաժողովին հնարավորություն կտար չեղարկել, դադարեցնել կամ տեղափոխել ընտրությունները այս կամ այն հիմքով»,– ընդգծել է Տիգրան Մուկուչյանը։
Ըստ ՔԿ տարածած հաղորդագրության՝ Արշալույս գյուղի բնակիչ Արամ Գրիգորյանից հաղորդում է ստացվել, որ հուլիսի 16-ին՝ ժամը 23-ի սահմաններում, Երեւան-Էջմիածին ավտոճանապարհին` Զվարթնոց թաղամասի գերեզմանատան հատվածում, «Վազ 21-06» մակնիշի ավտոմեքենայի սրահից ատրճանակով կրակել են «Լեքսուս» մակնիշի ավտոմեքենայի ուղղությամբ, որի մեջ գտնվել են Էջմիածնի քաղաքապետ Կարեն Գրիգորյանը եւ նրա եղբայր Արման Գրիգորյանը, ապա դիմել փախուստի: Ըստ հաղորդման՝ «Վազ 21-06» մակնիշի ավտոմեքենայի սրահում, որտեղից արձակվել են կրակոցները, գտնվել է Էջմիածնի քաղաքապետի թեկնածու Արթուր Թումանյանը։
Դիմումատուն նաեւ հայտնել է, որ հետապնդել են «Վազ 21-06» մակնիշի ավտոմեքենային, որին միացել է նաեւ Ա.Գրիգորյանի վարած «Տոյոտա քեմրի» մակնիշի ավտոմեքենան, հարվածել «Վազ 21-06» ավտոմեքենային, կանգնեցրել, սկսվել է քաշքշուկ, որի ժամանակ վերցրել են ատրճանակը, որով կրակոց է արձակվել «Լեքսուս» մակնիշի ավտոմեքենայի ուղղությամբ։
Թումանյանն ու նրա աջակիցը հոսպիտալացվել են։ Բժիշկների խոսքով՝ Թումանյանն ի վիճակի չէ ցուցմունք տալ։