Իրանը վճռականորեն դատապարտել է սաուդյան կոալիցիայի ավիահարվածը Եմենում Ալ-Հուդայդա նահանգի ուղղությամբ, որի հետեւանքով զոհվել եւ վնասվածքներ են ստացել տասնյակ խաղաղ բնակիչներ: ԻԻՀ-ի ԱԳՆ-ի ներկայացուցիչ Բահրամ Կասեմին ցավակցություն է հայտնել զոհվածների ընտանիքներին, հայտնում է Irna-ն:
«Ցավոք սրտի, երկրների եւ միջազգային հանրության անտարբերությունը եւ Սաուդյան Արաբիային սպառազինության եւ ռազմական տեխնիկայի տարբեր տեսակների վաճառքը ռեժիմին էլ ավելի մեծ համառությամբ են օժտել` իր չընդհատվող ագրեսիան եւ Եմենի ճնշված եւ անպաշտպան բնակիչների վրա հարձակումները շարունակելու գործում», - ասել է Կասեմին: Նրա խոսքով, արեւմտյան որոշ երկրների բազմանշանակ լռությունը ոչ միայն վրդովեցնում է, այլեւ ստիպում է նրանց դիտարկել «որպես երեխաներ սպանող ռեժիմի հանցակիցներ»:
