Երեւանի Էրեբունի եւ Նուբարաշեն վարչական շրջանների ընդհանուր իրավասության դատարանում այսօր` սեպտեմբերի 23-ին, շարունակվեց «Երրորդմասցի Լյովիկի» եւ նրա երկու ընկերների սպանության գործով դատաքննությունը:
Դատարանն այսօր շարունակեց ընթերցել գործով վկաների նախաքննական ցուցմունքները, քանի որ վերջիններս չեն ներկայացել դատարան:
Մասնավորապես, վկաներից Նարեկ Հովսեփյանը, որն այդ ժամանակ աշխատում էր Երեմյան եղբայրներին պատկանող «Զովք» սուպերմարկետում որպես բանվոր, պատմել է, որ դեպքի օրն ինքն է եղբայրներին պատկանող տաքսի ծառայությունից ամբաստանյալներին մեքենայով տեղափոխել Նորք Մարաշ: Վկայի խոսքով` ամբաստանյալներից միայն «Գաստիկին» չի ճանաչել, մյուսների հետ նախկինում ծանոթացել է Երեմյան եղբայրների միջոցով:
Հաջորդը դատարանն ընթերցեց Սուրեն Երեմյանի ցուցմունքը: Վերջինս սկզբում եղել է որպես կասկածյալ, սակայն հրաժարվել է ցուցմունք տալ: Օրեր անց նա դարձել է մեղադրյալ եւ ցուցմունք տվել: Սուրեն Երեմյանը նշել է, որ իրեն մեղավոր չի ճանաչում, քանի որ իրեն մեղսագրված արարքն ինքը չի կատարել:
«Ոչ մեկին չեմ պարտակել: Ծգլին, Տլեին եւ Գաստիկին անձամբ չեմ ճանաչում, ոչ մեկի հետ շփում չեմ ունեցել, ոչ մի տեսաձայնագրություն չեմ ջնջել, կամ չեմ ասել, որ ուրիշ մեկը ջնջի դա: Իսկ Սարգիս Գրիգորյանի հետ ծանոթացել եմ մոտ երկու տարի առաջ, չեմ էլ իմացել, թե ով է: Մյուս երկուսին անձամբ չեմ ճանաչում, միայն մականուններով գիտեմ, որ նման մարդիկ կան»,- ասել է Սուրեն Երեմյանը:
Սուրեն Երեմյանը պնդել է, որ դեպքի օրը ամբաստանյալներից ոչ մեկին չի տեսել:
Նշենք, որ Սուրեն Երեմյանը Երեւանի ավագանու ՀՀԿ խմբակցության անդամ Արմեն Երեմյանի եղբայրն է: Երեմյանները գործարարներ են:
Դատական նիստը շարունակվում է:
Ըստ մեղադրական եզրակացության` Վահան Հակոբյանը («Գաստիկ»), Սարգիս Հախանումյանն («Տլե») ու Սարգիս Գրիգորյանը նախնական համաձայնությամբ ապօրինի ձեռք են բերել եւ պահել զենք:
2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը եւ Սարգիս Գրիգորյանը («Ծգլ») նախնական համաձայնությամբ, շատերի կյանքի համար վտանգավոր եղանակով, երկու եւ ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգերից կրակահերթ են արձակել Լեւոն Ղազարյանի, Դրաստամատ Թադեւոսյանի եւ Մեսրոպ Նազարյանցի ուղղությամբ: Կրակոցների հետեւանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադեւոսյանը «Էրեբունի» բժշկական կենտրոն տեղափոխվելու ճանապարհին մահացել են:
Նրանց մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 1, 6, 7 կետերով: Խափանման միջոց է ընտրվել կալանավորումը:
Հիշեցնենք, որ 2015թ. մարտի 4-ին, ժամը 13:59-ին, ոստիկանությունը ահազանգ էր ստացել, որ «Նուբարաշեն» ՔԿՀ-ի դիմաց հնչել են կրակոցներ: Դեպքի վայր ժամանած ոստիկանները հայտնաբերել էին 1 զոհի եւ 2 վիրավորի, վիրավորներին տեղափոխել էին «Էրեբունի» ԲԿ, ճանապարհին նրանք մահացել էին։ Կրակոցների հետեւանքով մահացած երեք անձանցից մեկը Լեւոն Ղազարյանն էր, որը հայտնի է «Երրորդմասցի Լյովիկ» անունով, մյուսը 35-ամյա Դրաստամատ Թադեւոսյանն է, որը հայտնի է «Դերո» անունով, երրորդը՝ Մեսրոպ Նազարյանցը: