Հայկական գինու եւ գաթայի փառատոների օրերին շրջակայքում տասնյակ կիլոմետրեր հեռավորության վրա հյուրանոցները լեփ-լեցուն են: Այս մասին սեպտեմբերի 23-ին լրագրողներին ասել է Էկոնոմիկայի նախարարության Տուրիզմի վարչության պետ Մեխակ Ապրեսյանը:
Նրա խոսքով՝ ավանդական խոհանոցի փառատոները ավելի ու ավելի շատ զբոսաշրջիկների են գրավում ինչպես Հայաստանից, այնպես էլ արտասահմանից: Դա գաթայի փառատոնն է Խաչիկ գյուղում, դոլմայինը՝ Սարդարապատ գյուղում, խորովածինը՝ Ախթալա քաղաքում եւ ամենահայտնին՝ գինու փառատոնը՝ Ռինդ եւ Արենի գյուղերում (արդեն 8-րդ անգամ է անցկացվում):
Ապրեսյանը նշել է, որ տուրօպերատորները նախապես ուղեգրերի մեջ են ներառում փառատոների վայրերում կանգառները, եթե երթուղին մոտերքով է անցնում: Օրինակ՝ սեպտեմբերին Նորավանք կամ Գորիս ժամանող զբոսաշրջիկները պարտադիր այցելում են Արենի, եւ գյուղերում հյուրատներ են ստեղծվում, որոնց բնակիչները գյուղատնտեսական աշխատանքների համար եկամուտ են ստանում: Ըստ որում՝ նրանք հյուրեր են ընդունում նաեւ այլ ժամանակ: Դե իսկ փառատոների օրերին ազատ սենյակ ոչ մի տեղ չես գտնի՝ գրեթե մինչեւ Գորիս»,- հավաստիացրել է պաշտոնյան՝ ակնհայտորեն արձագանքելով վարչապետ Կարեն Կարապետյանի երեկվա հայտարարությանը, որն իր դժգոհությունն էր հայտնել, որ Հայաստանը տուրիզմի զարգացման տեմպերով զգալիորեն հետ է մնում հարեւան Վրաստանից, չնայած զարգացման համար մեծ պոտենցիալ ունի: