«Սասնա ծռեր» խմբի անդամ Էդվարդ Գրիգորյանի պաշտպան Լուսինե Սահակյանն այսօր` սեպտեմբերի 23-ին, բացարկի միջնորդություն է ներկայացրել Գրիգորյանի կալանքը երկարացնելու միջնորդությունը քննող դատավորին: Այս մասին լրագրողների հետ զրույցում ասաց Լուսինե Սահակյանը:
«Պարզ է, որ դատավորը եկել էր, որ պատրաստի որոշումը հրապարակի: Մենք սկզբում միջնորդեցինք, որ դատարան գա քննչական խմբի ղեկավարը, սակայն, դատավորը մերժեց այն: Ապա միջնորդեցինք, որ դատարանը քննչական խմբի ղեկավարին պարտավորեցնի ներկայացնել արդարացնող ապացույցները, դա էլ մերժվեց: Ու մենք ներկայացրինք բացարկի միջնորդություն` հիմքով, որ նման դատավորը չի կարող արդար որոշում կայացնել հատկապես քաղաքական գործերով»,- ասաց փաստաբանը:
Լուսինե Սահակյանը նշեց, որ դատարան է ներկայացվել բժիշկների ցուցմունքը, այնտեղ ոչինչ չկա այն մասին, որ Էդվարդ Գրիգորյանը նրանց պատանդ է պահել:
Փաստաբանը դատարանից ժամանակ է խնդրել մեղադրանքի հետ իր պաշտպանյալի կապ չունենալու վսրաբերյալ դատարան ապացույցներ ներկայացնելու համար:
Դատական նիստը հետաձգվել է, հաջորդ նիստը կկայանա վաղը ժամը 18:00-ին:
Էդվարդ Գրիգորյանը մեղադրվում է զենք ու զինամթերք կրելու եւ բժիշկներին պատանդ պահելու մեջ:
