ՄԱԿ Անվտանգության խորհուրդը բանաձեւ է ընդունել, որով բոլոր պետություններին կոչ է արել անհապաղ միանալ Միջուկային փորձարկումների համընդհանուր արգելման պայմանագրին: ԱԽ անդամները հատուկ ուղերձով դիմել են այն 8 երկրներին, որոնցից է կախված պայմանագրի ուժի մեջ մտնելը:
Ներկայումս Միջուկային փորձարկումների համընդհանուր արգելման պայմանագիրը ստորագրել են 183 երկրներ, 164 երկրներ պայմանագիրը վավերացրել են: Սակայն պայմանագրի ուժի մտնելու համար անհրաժեշտ է, որ այն վավերացնեն միջուկային պոտենցիալ տնօրինող եւս 44 երկրները: «44-ի ցուցակից» առայժմ դա արել են 36 երկրներ: Այժմ դա պետք է անեն մյուս 8 երկրները՝ Չինաստանը, ԱՄՆ-ը, Եգիպտոսը, Իսրայելը, Հնդկաստանը, Իրանը, Պակիստանը եւ Հյուսիսային Կորեան:
ՄԱԿ Անվտանգության խորհուրդը հանդես է եկել պայմանագրի արագ ուժի մեջ մտնելու օգտին: Իրենց բանաձեւում ԱԽ անդամները բոլոր երկրներին խորհուրդ են տվել զերծ մնալ միջուկային զենքի փորձարկումների պայթյուններ կամ այլ բնույթի միջուկային պայթյուններ իրականացնելուց:
ԱԽ անդամները հիշեցրել են, որ միջուկային զենք ունեցող 5 երկրները (Մեծ Բրիտանիա, Չինաստան, Ռուսաստան, Ֆրանսիա եւ ԱՄՆ) այդպիսի սպառազինություն չունեցող երկրներին անվտանգության երաշխիքներ են տվել: Այսօր ԱԽ-ն հաստատել է, որ այդպիսի երաշխիքները ամրապնդում են միջուկային զենքի չտարածման ռեժիմը:
ԱԽ անդամները նշել են Միջուկային փորձարկումների համընդհանուր արգելման պայմանագրի Ժամանակավոր տեխնիկական քարտուղարության արդյունավետ աշխատանքի մասին, մասնավորապես՝ սեյսմիկ դիտարկումներ անցկացնելու համար նրա հնարավորությունների:
