Մոլդովայի վարչապետ Պավել Ֆիլիպը ՄԱԿ-ին եւ միջազգային այլ կազմակերպությունների կոչ է արել առավել ակտիվորեն նպաստել սառեցված հակամարտությունների կարգավորմանը: Այս մասին նա հայտարարել է ելույթ ունենալով ՄԱԿ Գլխավոր վեհաժողովի 71-րդ նստաշրջանի շրջանակներում ընթացող համընդհանուր քաղաքականության բանավեճի ընթացքում:
Նա ողջունել է այն փաստը, որ ՄԱԿ ԳՎ օրակարգում ներառվել է ՎՈւԱՄ տարածքում, որի մեջ մտնում են Վրաստանը, Ադրբեջանը, Ուզբեկստանը եւ Մոլդովան, «սառեցված» հակամարտությունների կետը, որոնցից շատերը, նրա խոսքով, արդեն 25 տարի են ձգվում, օրինակ՝ Մոլդովայում, եւ շարունակում են բացասական ազդեցություն ունենալ ՎՈւԱՄ երկրների քաղաքական իրավիճակի եւ միլիոնավոր մարդկանց կյանքի վրա: Մոլդովայի վարչապետը նշել է, որ Մոլդովայի իշխանությունները պատրաստ են Մերձդնեստրի հակամարտության հարցով խաղաղ համաձայնագիր կնքելուն՝ այդ տարածաշրջանին հատուկ իրավաբանական կարգավիճակ տալու դեպքում, սակայն Մոլդովայի տարածքային ամբողջականության պահպանման սկզբունքի շրջանակում:
«Այդուհանդերձ, ցանկացած բանակցություն հաջողություն կունենա միայն այն դեպքում, եթե առկա է շահագրգիռ բոլոր կողմերի քաղաքական կամքը»,- հավելել է նա: Նրա խոսքով՝ Մոլդովայում ռուսական ռազմական զորակազմի առկայությունը, առանց Քիշնեւի համապատասխան համաձայնության, «բացասական ազդեցություն է ունենում տարածաշրջանի քաղաքական իրավիճակի եւ անվտանգության վրա» եւ հակասում է երկրի Սահմանադրությանը: