Ադրբեջանն այս պահին չի դիմի մեծամասշտաբ պատերազմի: Այս մասին NEWS.am-ի հետ զրույցում ասել է Հայաստանի պաշտպանության նախկին նախարար Վաղարշակ Հարությունյանը:
Անդրադառնալով Ադրբեջանի կողմից հոկտեմբերին ղարաբաղյան հակամարտության գոտում հնարավոր էսկալացիային՝ նա նշեց. «Կա մի բանաձեւ. մենք միշտ պետք է սպասենք եւ պատրաստ լինենք նոր էսկալացիայի: Մենք պետք է զգոն լինենք: Իսկ ինչ վերաբերում է նրանց գործողություններին, ապա հնարավոր է ամեն բան: Բայց ես գիտեմ մեկ բան. նրանք այսօր չեն գնա լայնամասշտաբ պատերազմի, դրա հավանականությունը շատ քիչ է: Բայց չի կարելի ոչինչ բացառել, քանի որ այդ մարդիկ զուրկ են տրամաբանությունից եւ սխալ որոշումներ են կայացնում: Պատմությունն ապացուցեց դա. Նրանք սխալ որոշում կայացրեցին եւ պարտություն կրեցին, ինչպես Հիտլերը Երկրորդ համաշխարհային պատերազմի ժամանակ»,- ասաց նախկին նախարարը: