«Ինգո Արմենիա» ապահովագրական ընկերության տնօրեն Լեւոն Ալթունյանը Հայաստանի նախագահ Սերժ Սարգսյանի եւ վարչապետ Կարեն Կարապետյանի հետ զրուցել է Հայաստանի առողջապահության նախարարի պաշտոնում իր հնարավոր նշանակման մասին, բայց իր ձեռքում հրաման չկա: Այդ մասին NEWS.am-ի թղթակցին հայտնել է ինքը` Լեւոն Ալթունյանը` պատասխանելով այն հարցին, թե հաստատում է արդյոք տեղեկությունները, որ կզբաղեցնի Հայաստանի առողջապահության նախարարի պաշտոնը:
«Եթե դուք ինձ հարցնեիք «Ինգո Արմենիա» ընկերության ապագայի հեռանկարների մասին, ես կկարողանայի ապառնի ժամանակով ասել, թե ինչ տեղի կունենա առաջիկա շաբաթվա կամ ամսվա ընթացքում: Բայց ես չեմ կարող ասել, թե ինչ տեղի կունենա պետությունում, որովհետեւ ես դրա վրա ոչ մի ազդեցություն չունեմ», - ասել է Լեւոն Ալթունյանը: Նա հաստատել է, որ այդ թեմայով զրույցել է Սերժ Սարգսյանի եւ վարչապետ Կարեն Կարապետյանի հետ:
«Ինձ հետ զրուցել են, բայց իմ ձեռքում հրաման չկա», - հայտնել է Լեւոն Ալթունյանը:
Նշենք, որ Լեւոն Ալթունյանը մասնագիտությամբ բժիշկ-անեսթեզիոլոգ է, ժամանակին աշխատել է Վնասվածքաբանության եւ օրթոպեդիայի ինստիտուտում:
