Առանց քաղաքական հարցերի կարգավորման՝ անհնար է հումանիտար խնդիրների լուծումը: Այս մասին հայտարարել է Լեռնային Ղարաբաղի Հանրապետության նախագահի մամուլի քարտուղար Դավիթ Բաբայանը՝ NEWS.am-ի թղթակցի խնդրանքով մեկնաբանելով փախստականների վերաբերյալ Ադրբեջանի ԱԳ նախարարի հերթական հայտարարությունը:
«Մենք բազմիցս ենք հայտարարել, որ հումանիտար բնույթի հարցերը անհրաժեշտ է լուծել կարգավորման վերջին փուլում: Առավել եւս, որ խոսքը վերաբերում է փախստականներին եւ հարկադիր տեղահանվածներին, մարդկանց, որոնք արդեն մեկ անգամ տուժել են: Մենք չենք կարող մարդկանց ճակատագրերը երկրորդ անգամ վտանգել»,- հիշեցրել է Դավիթ Բաբայանը:
Նա ընդգծել է, որ ադրբեջանական կողմի ներկայացրած տվյալները՝ «1 միլիոնից ավելի փախստականների մասին», գերուռճացված են: «Եթե, իհարկե, փախստականներ համարվեն նաեւ քաղբանտարկյալները եւ վատթարացող տնտեսական վիճակի ու իշխանությունների ճնշումների հետեւանքով Ադրբեջանից փախած անձինք»,- նշել է Դավիթ Բաբայանը՝ հավելելով, որ, որոշ տեղեկություններով, Ադրբեջանը նշված պատճառներով լքել է 2 միլիոնից ավելի քաղաքացի:
Դրա հետ մեկտեղ, ԼՂՀ նախագահի մամուլի քարտուղարը հիշեցրել է, որ ադրբեջանական կողմը համառորեն անտեսում է հայ փախստականների խնդիրը. «Ադրբեջանցի փախստականների առկայության վերաբերյալ հայտարարությունները եւ հայ փախստականների խնդիրը լռության մատնելը խտրականություն է եւ միջազգային իրավունքի կոպիտ խախտում: Չի կարելի մի խմբի փախստականներին ներկայացնել որպես զոհ՝ մոռանալով մյուս խմբի մասին»:
Դավիթ Բաբայանի խոսքով՝ նման պահվածքը վկայում է, որ ո՛չ Ալիեւը, ո՛չ նրա կլանը, ո՛չ Ադրբեջանի իշխանությունները կարգավորման ուղղությամբ կոնկրետ քայլերի պատրաստ չեն, իսկ փախստականների մասին հիշատակումները ոչ այլ ինչ են, եթե ոչ «սլաքների տեղափոխության» փորձ:
