Զանգվածային անկարգություններին մասնակցելու մեջ մեղադրվող՝ «Ոտքի Հայաստան» նախաձեռնության անդամ Դավիթ Հովհաննիսյանը եւս երկու ամիս կմնա կալանքի տակ: Այսօր՝ սեպտեմբերի 24-ին, նման որոշում է կայացրել Երեւանի Արաբկիր եւ Քանաքեռ-Զեյթուն վարչական շրջանների ընդհանուր իրավասության դատարանը՝ բավարարելով քննիչի միջնորդությունը:
NEWS.am-ի թղթակիցը հաղորդում է, որ այս պահին դատարանի շենքի առջեւ են հավաքվել Սասնա ծռեր խմբի անդամների աջակիցները, որոնք իրենց հետ բերել են «Սասնա ծռեր» գրությամբ պաստառներ եւ պարբերաբար վանկարկում են «Սասնա ծռեր», միացնում նրանց նվիրված երգը:
Նշենք, որ Արաբկիրի դատարանում այսօր արդեն 11 որոշում է կայացվել «Սասնա ծռեր» խմբի անդամների եւ նրանց աջակցելու մեջ մեղադրվողների գործերով: Նրանք բոլորի կալանքների ժամկետները երկարացվել են: Այսօր դեռ 5 միջնորդության քննություն էլ սպասվում է:
Դավիթ Հովհաննիսյանին մեղադրանք է առաջադրվել ՀՀ քրեական օրենսգրքի 225 հոդվածի երկրորդ մասով, այն է՝ զանգվածային անկարգություններին մասնակցելը: