Մեծ Բրիտանիան ու Ֆրանսիան, ՄԱԿ ԱԽ արտահերթ նիստ նախաձեռնելով, դրանով իսկ Սիրիայի ահաբեկիչներին աջակցության ակնհայտ ազդանշան են ուղարկել: Նման հայտարարություն է արել ՄԱԿ-ում Սիրիայի մշտական ներկայացուցիչ Բաշար Ջաաֆարին, փոխանցում է ՏԱՍՍ-ը:
«ՄԱԿ ԱԽ արտահերթ նիստի գումարումը ակնհայտ ուղերձ է ահաբեկիչներին, որոնց չափավոր ընդդիմություն են համարում: Դա ազդանշան է քաղաքական աջակցության ու այդ աջակցությունը շարունակելու մտադրության մասին»- շեշտել է դիվանագետը:
Սիրիայի կառավարությունը ոչ մեկին ոչ մի թիզ հող չի տա ու կվերականգնի Հալեպի վրա ամբողջական հսկողությունը, հայտնել է ՄԱԿ-ում երկրի մշտական ներկայացուցիչը:
«Սա Ջիբուտիում կամ Բրազիլիայում գտնվող քաղաք չէ...Սիրիայում մենք երկու մայրաքաղաք ունենք՝ Դամասկոսն ու Հալեպը,- ասել է նա,- Եվ ուզում եմ վստահեցնել բոլորին, որ մենք կվերականգնենք դրանց նկատմամբ ամբողջական վերահսկողությունը»:
Ջաաֆարին, քննադատելով արեւմտյան երկրների ներկայացուցիչների ելույթները, հիշեցրել է, որ Սիրիան դիմակայում է ահաբեկչական խմբավորումներին ու մտադիր չէ որեւէ մեկին հանձնել իր տարածքը: «Մենք չենք հրաժարվի ոչ մի թիզ հողից ՝ առաջնորդվելով երկրի սահմանադրությամբ ու միջազգային նորմերով»,- նշել է նա:
