Երևանում փոքր խանութները սուպերմարկետների հետ մրցակցության հավասար պայմաններ կստանան: Այս մասին սեպտեմբերի 26-ին ԱԺ արտահերթ նիստին հայտնել է Երևանի առաջին փոխքաղաքապետ Կամո Արեյանը, ներկայացնելով «ՏԵղական տուրքերի ու վճարների մասին» օրենքում համապատասխան փոփոխությունների նախագիծը:

Նրա խոսքով փոքր բիզնեսը բողոքում էր քաղաքապետարանին, որ ստիպված է նույնքան վճարել, որքան խոշոր սուպերմարկետները: «Հիմա մենք կփոխենք տուրքերի սանդղակը: Դրանք պայմանավորված կլինեն առևտրային օբյեկտների ու ռեստորանների մակերեսով: Փոքրերը ավելի քիչ կվճարեն, խոշորները՝ շատ»,- հավելել է Արեյանը

Հիմա հանրային սննդի կազմակերպման համար եռամսյակային տուրքը կազմում է 1-6 հազար դրամ կապիտալ շենքերում ու զրոյից 1 հազար դրամ՝ ոչ կապիտալներում: Իսկ հիմա վճարները առաջարկում են ըստ մակերեսի որոշել: Ըստ կապիտալ շենքի մակերեսի՝ տուրքերը կազմելու են 5 հազար դրամից սկսած (մինչեւ 26 քառ մ համար) մինչեւ 50 հազար (501 քառ մ եւ ավելին): Այդ նույն մակերեսով ոչ կապիտալ շենքերից գանձվելու է 1-25 հազար դրամ: Նույն սկզբունքով է փոխվելու նաեւ ոգելից խմիչքի ու ծխախոտի խանութներից գանձվող վճարները (նույն մակերեսների դեպքում՝ 10-100 հազար դրամ):