Եվրասիական տնտեսական միության (ԵԱՏՄ) երկրները եւ Չիլիի Հանրապետությունը քննարկում են ազատ առեւտրի գոտու (ԱԱԳ) ստեղծման հարցը, տվյալ փուլում անհրաժեշտ է հաշվարկել տնտեսական բոլոր հետեւանքները: Այդ մասին լրագրողներին հայտնել է Եվրասիական տնտեսական հանձնաժողովի (ԵՏՀ) ինտեգրացիայի եւ մակրոէկոնոմիկայի նախարար Տատյանա Վալովայան, հայտնում է ՏԱՍՍ-ը:
«Ազատ առեւտրի գոտի ստեղծելուց առաջ, պետք է գնահատել այդ քայլի տնտեսական հետեւանքները: Ներկայումս կողմերը դեռեւս պատրաստ չեն գնահատել այդ քայլի տնտեսական հետեւանքները, դրա համար շատ լուրջ աշխատանք է պետք, այդ թվում` առեւտրատնտեսական դիսբալանսի հավասարեցման ուղղությամբ: Բայց այսօր ԵՏՀ-ում այն գործընկերները, որոնք պատասխանատու են ԱԱԳ-ի ստեղծման համար, պրոֆիլային սեմինար են անցկացնում չիլիացի գործընկերների հետ, որպեսզի փորձի փոխանակում կատարեն եւ այդ աշխատանքի ընթացքում հնարավոր կլինի պարզել` արդյոք մենք կգնանք այդ ուղղությամբ», - հայտնել է Վալովայան ԵՏՀ-ի եւ Չիլիի կառավարության միջեւ փոխգործակցության համատեղ հանձնաժողովի նիստի արդյունքում:
Նրա խոսքով, այսօր փոխադարձ առեւտրի դինամիկան դրական է, բայց միեւնույն ժամանակ էական դիսբալանս է նկատվում. Չիլին գործնականում 10 անգամ ավելի շատ է արտահանում, քան գնում է ԵԱՏՄ-ի պետություններում:
Վալովայան հավելել է, որ ԱԱԳ-ի ստեղծման թեման արդեն վաղուց բարձրացվել է չիլիական կողմից, դրանում հետաքրքրված են նաեւ ռուսաստանյան շատ արտահանողներ: «Բայց դա շատ լուրջ, պատասխանատու որոշում է, որը միշտ ընդունվում է բոլոր հինգ պետության կողմից եւ դրա համար պետք է ստեղծվեն անհրաժեշտ բոլոր պայմանները», - ասել է նախարարը:
Նա ճշտել է, որ համատեղ հանձնաժողովի հաջորդ նիստը տեղի կունենա եկող տարի` Չիլիում, այնտեղ կգնան ԵԱՏՄ-ի երկրների բիզնեսի ներկայացուցիչները` իրենց հնարավորությունները ներկայացնելու:
Չիլիի Հանրապետության արտգործնախարարի առեւտրի գծով տեղակալ Անդրես Ռեբոլյեդոն իր հերթին ընդգծել է, որ պետությունում ակտիվորեն զարգանում է գյուղատնտեսությունը, ինչի կապակցությամբ հանրապետության կառավարությունը հետաքրքրված է մեծացնել ԵԱՏՄ-ի երկրներից պարարտանյութի, տեխնոլոգիաների, մեքենաշինական ապրանքների եւ մեքենաների ներմուծումը:
