Կառավարությունն առաջարկում է երեք նախարարություններ անվանափոխել եւ եւս մեկը լուծարել: Այս մասին սեպտեմբերի 26-ին ԱԺ-ում հայտարարել է արդարադատության նախարարի պաշտոնակատար Արփինե Հովհաննիսյանը՝ ներկայացնելով «Հայաստանի Հանրապետության կառավարության կառուցվածքի մասին» օրենքում փոփոխությունների օրինագիծը:
Նախատեսվում է Էկոնոմիկայի նախարարությունը անվանափոխել Տնտեսական զարգացման եւ ներդրումների նախարարություն, Տրանսպորտի եւ կապի նախարարությունը՝ Տրանսպորտի, կապի եւ տեղեկատվական տեխնոլոգիաների նախարարություն, Էներգետիկայի եւ բնական պաշարների նախարարությունը՝ Էներգետիկ ենթակառուցվածքների եւ բնական պաշարների նախարարություն: Առաջարկվում է Քաղաքաշինության նախարարությունը վերացնել:
Հիշեցնենք, որ այս առաջարկները նոր վարչապետ Կարեն Կարապետյանը ներկայացրել է կառավարության վերջին նիստերից մեկում: Կառավարության նոր կառուցվածքը պետք է մեծացնի կառավարման արդյունավետությունը, հավելել է նա:
Նիստի ժամանակ Կարապետյանը նաեւ առաջարկել է Քաղաքաշինության նախարարությունը վերակազմավորել Ճարտարապետության եւ հուշարձանների պահպանության կոմիտեի: Էկոնոմիկայի նախարարության վերանվանման հետ միասին առաջարկվում է նրա ենթակայությունից հանել տեղեկատվական տեխնոլոգիաները (Տրանսպորտի նախարարության մեջ ընդգրկել) եւ տուրիզմը (առանձին կոմիտե ստեղծել): Էներգետիկայի նախարարության վերանվանումը պայմանավորված է նրա ենթակայության տակ շինարարական համակարգերը մտցնելու առաջարկով: