Ադրբեջանի «Մայիսի 28-ի» Նավթագազային մշակման վարչության հարթակում կրակ է բռնկվել հանքահորից գազի արտանետման պատճառով: Այս մասին հայտնում է contact.az-ը՝ վկայակոչելով SOCAR-ի մամուլի ծառայությանը:
Ձեռնարկված միջոցառումների արդյունքում հարթակում եղած 49 մարդիկ չեն տուժել: Ներկայումս հակաշատրվանային ռազմականացված ծառայության աշխատակիցները միջոցառումներ են ձեռնարկում գազերի արտանետումը դադարեցնելու համար: Դեռեւս հայտնի չէ՝ արդյոք հաջողվե՞լ է կրակը մարել եւ հարթակից մարդկանց տարհանել:
Հիշեցնենք, որ 2015 թվականի դեկտեմբերի 4-ին նույն հանքավայրի 10-րդ հարթակում Ադրբեջանի պատմության ընթացքում ամենախոշոր վթարն էր տեղի ունեցել: Գազի այրման հետեւանքով 65 մարդ արգելափակվել էր ծովային հարթակում: Հաջողվել էր փրկել նավթագործներից միայն կեսին: Զոհվածների մի մասին այդպես էլ չէր հաջողվել գտնել, իսկ 13 մարդու մարմինները փրկարարները հայտնաբերել էին աղետից մեկ շաբաթ եւ նույնիսկ ամիսներ հետո: