«Սասնա ծռեր» խմբի անդամ Արմեն Լամբարյանը, որն այսօր՝ սեպտեմբերի 26-ին, «Դատապարտյալների հիվանդանոց» ՔԿՀ-ից տեղափոխվել է Երեւանի «Էրեբունի» հիվանդանոց, սեպտեմբերի 27-ին կենթարկվի վիրահատության: NEWS.am-ի հետ զրույցում «Էրեբունի» հիվանդանոցի տնօերն Միքայել Մանուկյանը նշեց, որ վիրահատվելու է Արմեն Լամբարյանի ոտքը՝ տեղադրվելու է մետաղական հարթակ:
«Ոսկրերի օստեոսինթեզ է արվելու, այս պահին նա գտնվում է Վերակենդանացման բաժանմունքում: Իրեն լավ է զգում, Վերակենդանացման բաժանմունքում է միայն նրա համար, որպեսզի վաղը նորից չտեղափոխենք այստեղ»,-ասաց նա:
Ավելի վաղ տեղեկացրել էինք, որ Արմեն Լամբարյանին մեղադրանք է առաջադրվել ՀՀ Քր.օր.-ի 235 հոդվածի 3-րդ մասով (ապօրինի զենք զինամթերք ձեռք բերել, իրացնել, պահել, փոխադրել) եւ 219-րդ հոդվածի 3-րդ մասի 1-ին կետով (կազմակերպված խմբի կողմից շենքեր, շինություններ, տրանսպորտի, հաղորդակցության կամ կապի միջոցներ զավթելը):