Եվրամիությունը պետք է Եգիպտոսի եւ Թունիսի հետ միգրանտների վերաբերյալ այնպիսի համաձայնագիր կնքի, որն ավելի վաղ ձեռք է բերվել Թուրքիայի հետ: Այդ մասին հայտնել է Գերմանիայի կանցլեր Անգելա Մերկելը: Նա նաեւ ընդգծել է միգրացիայի պատճառների դեմ պայքարի անհրաժեշտությունը եւ կոչ է արել ավելի շատ միջոցներ հատկացնել այդ միջոցառումների համար, հայտնում է DW-ն:
Մարտին ԵՄ-ի եւ Թուրքիայի միջեւ ստորագրված համաձայնագրի համաձայն, ծովային ճանապարհով անօրինականորեն Հունաստանի ափեր հասած բոլոր փախստականները պետք է հետ ուղարկվեն Թուրքիա: Միաժամանակ Հունաստանից Թուրքիա վերադարձված յուրաքանչյուր միգրանտի դիմաց ԵՄ-ի երկրները թուրքական տարածքից սիրիական մեկ փախստական կընդունեն:
Բացի այդ, Բրյուսելը համաձայնել է Անկարային 6 մլրդ եվրո տրամադրել. այդ գումարը պետք է ծախսվի փախստականների կարիքների վրա:
