Ժողովուրդն ուզում է գրեթե բոլոր իշխանավորներին սպանված տեսնել։ Նման սկանդալային հայտարարություն այսօր՝ սեպտեմբերի 26-ին, ԱԺ-ում արել է «Ժառանգություն» խմբակցության պատգամավոր Զարուհի Փոստանջյանը։
Նրա խոսքով, Գյումրի եւ Վանաձոր քաղաքներում ՏԻՄ ընտրություններում արդեն կա զոհ, «սպանվել է երիտասարդ» (քննության տվյալներով խոսքը Գյումրիում ԲՀԿ նախընտրական ցուցակը գլխավորող Վարդեւան Գրիգորյանի րդու ինքնասպանության մասին է-խմբ)։
«Կասկած չկա, որ նրա մահը բռնի է եղել։ Այդ սպանությունը ցույց է տալիս, որ հասարակությանը սպառնում են ցնցումներ, երբ մարդիկ տեսնում են, որ անարդարությանն ու անիրավությանը վերջ տալ կարելի է միայն հարձակումներով։ Եվ այդ ժամանակ հարձակման թիրախ կարող է լինել ցանկացած պաշտոնատար անձ։ Արդեն հիմա հասարակությունն ուզում է մահացած սպանված տեսնել գրեթե բոլոր բարձրաստիճան պաշտոնյաներին։ Դուք նարնց այլ ընտրություն չեք թողել, եթե ՀՀ քաղաքացիների ավելի քան 50 տոկոսը սոված է։ Եթե դուք չեք պատժում գողերին, ժողովուրդն ինքը նրանց կպատժի»,-հայտարարեց Փոստանջյանը։
