Մանկատան շրջանավարտ 29-ամյա Անի Չերչինյանը չի կարողանում վճարել պետության հատկացրած բնակարանի նորոգման համար վերցրած վարկը։ Նա Վանաձորի մանկատան շրջանավարտ է, մանկատնից հեռացել է 2008 թ.-ին: Որոշ ժամանակ անց ընտանիք է կազմել մանկատան նախկին սաներից մեկի հետ: Ընտանիքը մի քանի տարի բնակվել է Վանաձորի հանրակացարաններից մեկում: Անին ասում է, որ այդ ընթացքում տարիներ շարունակ դիմել է աշխատանքի եւ սոցիալական հարցերի նախարարություն՝ իրեն հասանելիք բնակարանի տրամադրման համար: Մի քանի տարի անց բաղձալի բնակարանը հատկացվել է, սակայն անմխիթար վիճակում:
«Լրիվ քանդած, ավերակ վիճակում էր, ոչինչ չի եղել, ոչ պատուհան, ոչ դուռ, ֆաներկեք էր մեխած: Տանը նույնիսկ ջրի խողովակներ չկային, հատակը ցեմենտ-բետոն էր միայն»,- պատմում է Անին:
Տունը փոքրիշատե կարգի բերելու ու երեք մանկահասակ երեխաների համար տարրական պայմաններ ապահովելու համար ընտանիքը բանկից վարկ է վերցրել:
«Երեխաներս 8, 6 եւ 4 տարեկան են: Նրանց հետ հնարավոր չէր ապրել էդ տանը: Պատուհաններ տեղադրեցինք, դուռ դրեցինք, հատակը սարքեցինք, ջրի խողովակներն անցկացրինք: Հիմա էլ դեռ բավական շատ գործ կա տան վրա, շատ խոնավ է, երեխեքս անընդհատ մրսում են, բայց ինչ արած»,- ասում է Անին:
Ընտանիքը վարկը վերցրել, սակայն չի կարողացել վճարել: Վեց ամիս է, Անին որեւէ վճարում չի կատարել: Այժմ ընտանիքի վճարելիք վարկի գումարը կազմում է 900.000 դրամ:
Ամուսինը շուկայում բեռնակիր է: Անիի խոսքով նրա օրվա վաստակածը չի բավականացնում նույնիսկ երեխաների սննդի հարցերը հոգալու համար: Ընտանիքի հիմնական եկամուտը 34.000 դրամ կազմող ընտանեկան նպաստն է:
«Հատկապես ձմռանը նույնիսկ 10 դրամ չի մնում էդ փողից, ամբողջը տունը տաքացնելու համար է ծախսվում»,- նշում է երեք երեխաների մայրը: