Ոստիկանի նկատմամբ բռնություն գործադրելու մեջ մեղադրվող` «Հիմնադիր խորհրդարանի» անդամ Գեւորգ Սաֆարյանի գործով դատական նիստին այսօր` սեպտեմբերի 27-ին, ցուցմունք տվեց «Արմոբիլ» անվտանգության ծառայության աշխատակից Արթուր Պետրոսյանը, որը Ամանորի գիշերն ականատես է եղել Ազատության հրապարակում տեղի ունեցած վիճաբանությանը: նա նշեց, որ ամբաստանյալին չի ճանաչում եւ Ամանորի գիշերն ընդամնեը տեսել է, թե ինչպես են Օպերայի հարթակում վիճաբանում ոստիկանության ծառայողներն ու քաղաքացիները:
«Ձայներ լսեցի, այդ ձայների ուղղությամբ գնացի: Տեսա, որ քաղաքացիների եւ ոստիկանների միջեւ վիճաբանություն է տեղի ունենում: Թվով քաղաքացիներն ավելի շատ էին, հայհոյանքներ էին լսվում, որոնք վերացական բնույթ էին կրում եւ ուղղված էին ոստիկաններին: Քաղաքացիները քաշքշուքի ժամանակ հարվածում եւ հայհոյում էին ոստիկաններին: Ես մոտեցա նրանց, ասացի` ամոթ ա, Ամանորի գիշեր է, պետք չէ նման իրավիճակ ստեղծել»,-պատմեց նա:
Նա նշեց, որ Ամանորի գիշերը չի տեսել Գեւորգ Սաֆարյանին եւ չի տեսել որեւէ քաղաքացի, որը հարվածում է ոստիկանին եւ գցում ներքեւ:
Գեւորգ Սաֆարյանին մեղադրանք է առաջադրվել Քրեական օրենսգրքի 316-րդ հոդվածի 1-ին մասով:
Հիշեցնենք, որ Երեւանի Ազատության հրապարակում 2016թ. հունվարի 1-ին ընդդիմադիր «Նոր Հայաստանի» անդամների եւ ոստիկանների միջեւ բախումներ էին տեղի ունեցել: Պատճառը տոնածառի հագուստով մայրաքաղաքի փողոցներում շրջող ակտիվիստն էր: Երեք անձ բերման էր ենթարկել, այդ թվում՝ Գեւորգ Սաֆարյանը, որին հետագայում էլ կալանավորեցին:
Ըստ իրավապահ մարմինների` Գեւորգ Սաֆարյանը բռնություն է գործադրել Ոստիկանության 4-րդ հատուկ գումարտակի հրամանատար, ոստիկանության կապիտան Գեղամ Խաչատրյանի նկատմամբ:
