Կառավարությունը ներդրումային նախագծերի հայտեր է ընդունում Հայաստանի խոշորացված համայնքներում: Այս մասին սեպտեմբերի 27-ին Աժ-ում ասել է տարածքային կառավարման ու զարգացման առաջին փոխնախարար Վաչե Տերտերյանը՝ ներկայացնելով «Ֆինանսական համահարթեցման մասին» օրենքի նախագիծը:
Ծրագրերի հայտեր են ներկայացվում արդեն երեք խոշորացված համայնքներում՝ Թումանյան (Լոռվա մարզ), Դիլիջան (Տավուշի մարզ), Տաթեւ (Սյունիքի մարզ): Բոլոր երեք համայնքներում հայտարարված են Տարածքային զարգացման հիմնադրամի (Սոցիալական ներդրումների հիմնադրամի իրավահաջորդի, որը գործում էր Համաշխարհային բանկի վարկային միջոցներով) տենդերներ: Հիմա Հիմնադրամը յուրացնում է DPO-3 վարկային ծրագիրը: «Խոշորացված համայնքներում կբարձրանան ֆինանսավորման պահանջները, բայց ենթակառուցվածքների կամ սոցիալական ծառայությունների զարգացման ծրագրերը ազդեցություն կունենան արդեն ոչ թե 1 գյուղի կամ քաղաքի, այլ մի քանիսի վրա»- պարզաբանել է փոխնախարարը:
Թումանյանը, Դիլիջանը ու Տաթեւը միավորվել են 2016-ի փետրվարին լոկալ հանրաքվեների արդյունքներով: Մեկ համայնքում միավորվել է մի քանի գյուղ (առաջին 2 դեպքերում՝ քաղաքի՝ նախկին խորհրդային շրջկենտրոնի շուրջ):
Թումանյանն ու Տաթեւը 200-ական մլն դրամ դրամաշնորհային միջոցներ կստանան (մոտ 420 հազար դոլար), իսկ Դիլիջանը՝ 800 մլն ( հաշվի առնելով, որ այնտեղ բնակչությունը համեմատաբար շատ է):