ՏԻՄ ընտրությունները ակնհայտորեն ցույց են տալիս գյուղաբնակ վայրերի բնակիչների կախվածությունն իրենց ղեկավարներից, նաեւ վախի ու ճնշումների մթնոլորտը: Այս մասին, այսօր՝ սեպտեմբերի 27-ին, ԱԺ-ում հայտարարել է ՕԵԿ խմբակցության ղեկավար Հեղինե Բիշարյանը:
Նա անդրադարձել է նոր կառավարությանը՝ նշելով. «Վերջերս շատ քիչ եմ մտնում ֆեյսբուք, իմ ֆեյսբուքյան ընկերները կտեսնեն: Որովհետեւ սիրտս խառնում է այն PR-ից, որ կատարվում է՝ խայտառակ, անմակարդակ: Ամեն ինչ տարափ է՝ կառավարությունը… ձերբակալություններ են լինելու: Ինձ թվում էր՝ էսօր մենք զոհեր կունենայինք, կամ ձերբակալություններ կլինեին, բայց դեռ ձեն կա:
Այդ կառավարությունը, որ պետք է մեր երկրում նոր որակներ բերի, որը պետք է այնպես անի, որ կարճ ժամանակում մենք վերափոխվենք, դառնանք Սինգապուր, ապա ինչո՞ւ եք շտապել այս փաստաթուղթը բերել այստեղ: Գուցե այս կառավարությունը, որը մանկության ընկերություն է, ուսանողական ընկերություն է, նոր դեմքերի կառավարություն է, գուցե իրենք իրենց ձեռագիրը դնեին այս նախագծի մեջ: Գուցե ինչ-որ բան այլ ճանապարհով գնար: Մենք հասկանայինք՝ այս դոտացիաները տալիս ենք համայնքներին, գյուղերին ու ոչ մի հնարավորություն չենք տալիս զարգացման, աղքատ բնակիչներին հնարավորություն չենք տալիս հնարավորություն մանկապարտեզներից անվճար օգտվելու:
Ես մասնակցում եմ ընտրություններին, տեսնում եմ՝ Գյումրիի բյուջեն 3.2 մլրդ, որից 2 մլրդ-ը դոտացիա է, Վանաձորի բյուջեն 2,2 մլրդ դրամ է, որի 1,3 մլրդը դոտացիա է: Այդ տարածքներում արդեն փողոց չմնաց, մեր թեկնածուների հետ շրջել ու նայել ենք: Ասում եմ՝ այդ դոտացիաներով որեւէ բան չի փոխվում, էլ չեմ խոսում այն գյուղերի մասին, որտեղ ուղղակի խայտառակություն է»:
Նրա խոսքով, աընդունելի է, երբ Տարածքային կառավարման եւ զարգացման փոխնախարար Վաչե Տերտերյանն ասում է, որ համայնքի դոտացիաների վերահսկողությունը պետք է իրականացնի համայնքի ավագանին. «Ասում եք՝ ավագանին փրկի, այսօր եթե կառավարությանը բարձր աշխատավարձ ենք տվել՝ սաղ երկիրը թալանել է, 10 օր հետո բոլորի անունը որպես հանցագործ գրվում է, ո՞նց կարող է անվճար ավագանին փրկի: Մի հատ հարցրեք՝ էդ ավագանին հացի փող ունի՞, որ 10 անգամ գնա, գա մարզկենտրոն, իջնի, բարձրանա, կոշիկը մե՞նք ենք առել»:
