Իրանի նախկին նախագահ Մահմուդ Ահմադինեժադը հայտնել է, որ մտադիր չէ իր թեկնածությունն առաջադրել 2017-ի նախագահական ընտրություններին, հայտնում է իրանական Fars գործակալությունը:
Ահմադինեժադը, որը երկրի նախագահի պաշտոնը զբաղեցրել է 2005-2013 թթ, չէր հայտնել 2017-ի մայիսին ծրագրված ընտրություններին մասնակցելու ծրագրերի մասին, սակայն վերջին մի քանի ամիսներին նրա հրապարակային ելույթները շահարկումների տեղիք էին տվել, իբրեւ նախկին նախագահը մեծ քաղաքականություն է վերադառնում:
Իր որոշման մասին նա սեպտեմբերի 27-ին հայտնել է Իրանի գերագույն առաջնորդ այաթոլա Ալի Համենեին ուղղված նամակում: «Դուք ինձ խորհուրդ եք տվել զերծ մնալ, քանի որ իմ մասնակցությունը ընտրությունների այս փուլին նպատակահարմար չի լինի, ու ես համաձայն եմ» այդ խորհուրդին, գրել է նախկին նախագահը, հիշատակելով Համենեի հետ հանդիպումը օգոստոսի վերջին:
Իրանական լրատվամիջոցները սեպտեմբերի 26-ին հայտնել էին, որ Իրանի գերագույն առաջնորդ այաթոլա Ալի Համենեին Ահմադինեժադին խորհուրդ չի տվել առաջադրվել պետության ղեկավարի պաշտոնին այն մտավախությունների պատճառով, որ նախկին նախագահի մասնակցությունը ընտրություններին կնպաստի երկիրը երկու ճամբարի բաժանելուն ու կվնասի պետությանը:
Ըստ դիտորդների Ահմադինեժադը, որը հայտնի է իր պահպանողական հակաարեւմտյան հայացքներով, կարող էր լուրջ մրցակից դառնալ գործող նախագահ Հասան Ռոհանիի համար, որը իրանական քաղաքականության չափավոր թեւի ներկայացուցիչ է:
