Հայաստանի միլիոնատերերը հիացած չեն իրենց զոքանչներով, բայց նրանց անունով ոսկու սարեր են գրանցում: Այս մասին սեպտեմբերի 27-ին հայտարարել է «Օրինաց երկիր» խմբակցության ղեկավար Հեղինե Բիշարյանը՝ ելույթ ունենալով Վարչական իրավախախտումների օրենսգրքում փոփոխությունների օրինագծի քննարկմանը: Օրինագծով առաջարկվում է բարձրաստիճան պաշտոնյաներին տուգանել եկամուտների մասին հայտարարագիր լրացնելուց հրաժարվելու կամ սխալ լրացնելու դեպքում
«Հայաստանի անկախության 25 տարիների ընթացքում երկրից օֆշորներ է դուրս բերվել 29 մլրդ դոլար, այդ թվում՝ վերջին 10 տարում՝ 9,8 մլրդ դոլար: Ամբողջ ունեցվածքը գրանցվում է զոքանչների կամ այլ մերձավորների անունով: Չնայած իրենց զոքանչներով կարծես հիացած չեն: Նորմալ է, ես էլ եմ զոքանչ: Բայց մի՞թե իշխանությունը չի ցանկանում հասկանալ, թե ով եւ ինչու է դա անում»,- ասել է Բիշարյանը:
